Alusingathwe ngobunono udaba lwamathuna
SIKHOMBISA ukuzwelana nokucabangela abampofu isinqumo sikaMasipala weTheku sokubuyekeza umgomo wawo olawula ukusetshenziswa kabusha kwethuna osekwangcwatshwa kulona.
Ngenxa yenkinga yokugcwala kwamathuna kamasipala eThekwini, umkhandlu wabeka umgomo wokuthi amathuna osekudlule iminyaka engu-10 kwangcwatshwa kuwo, angabuye asebenziseke.
Amanye amaphuzu akulo mgomo athi amathuna okungcwatshwa kuwo okwesibili nokwesithathu angenawo amatshe nangakhokhelwa imali yerenti enguR950.
Lo mgomo ubucindezela abantu abampofu abangenawo amandla okufaka amatshe emathuneni kanjalo nokuwakhokhela irenti.
Yingakho siwuncoma umasipala ngokuthatha isinqumo sokubuyekeza lo mgomo ukucabangela nokuzwelana nabangenamandla.
IMeya yeTheku uNkk Zandile Gumede ngeledlule itshele iKhomishini yamaLungelo, iNkolo namaSiko eMphakathini ukuthi umasipala uhlela ukuwubuyekeza umgomo.
Ixolisile ngokucindezeleka kwabampofu ngalo mgomo, yathi umasipala ubungaqondile ukubabandlulula.
Ikuvezile ukuthi sebeziqalile nezinhlelo zokukhuluma noMnyango wezokuBusa nokuBambisana KwaZulu-Natal ngokuthi kuchitshiyelwe umgomo wokusetshenziswa kwethuna, osekuke kwangcwatshwa kulo.
Indlela umasipala otshengisa ukulusingatha ngayo lolu daba siyayikhuthaza. IMeya yenze into ehlula osopolitiki abaningi ukuvuma iphutha bese kubhekisiswa lokho okungahambi kahle.
Ziningi izinto ezikhalisa abantu ngomasipala. Siyafisa ukuthi nazo zisingathwe njengalo lolu daba lwamathuna, kuvunywe iphutha uma likhona bese kubhekwa isisombululo.
Siyethemba nokuthi udaba lwamathuna luzosingathwa ngenhlonipho nangesizotha njengoba kuwudaba olubucayi oluthinta nenkolo namasiko.
Njengoba imeya ikuvezile nokuthi kukhona abangcwabe emhlabeni ongafanele futhi babazisiwe ngalokhu, nalapha sethemba ukuthi umkhandlu nezakhamizi bazobambisana bahloniphane, uhlelo lokususwa kwamathuna lube nesizotha.