Owe-ANC uthi banamandla okulungisa isimo
AKAKHATHAZEKI ngezinxushunxushu ezingaphakathi eqenjini le-ANC umakadebona wayo, othi owabo umsebenzi wokubuyisa amandla kubantu bawenza.
UMnuz Mac Maharaj ukusho lokhu ngoLwesihlanu emgubheni woSuku lweNkululeko obuhambisana nesifundo sikaDkt Nelson Mandela esikoleni oHlange High, eNanda. UMaharaj owaba ngungqongqoshe wokuqala wezokuthutha ngaphansi kukahulumeni wentando yabantu, ubeyisikhulumi sosuku emcimbini owenzelwe kulesi sikole esiyingxenye yamagugu njengoba uMandela avota khona ngo-1994.
Uthe isizukulwane sabo kwiANC sathatha umsebenzi ngo-1912 isungulwa kodwa kwathatha iminyaka engu-82 ukufinyelela entandweni yeningi.
“Maningi amaphutha enzeka ngaleso sikhathi kodwa obekusiza wukuthi i-ANC ibikwazi ukuwalungisa, ibuyise namandla. Namanje angiphoxeki ngokwenzeka kwi-ANC ngoba sawabuyisela amandla kubantu, sekukubona ukuthi bawasebenzisa kanjani. Impilo ayibona ubuthebelele futhi akekho umuntu ongenasici. Kulula ukubhidliza kodwa kunzima ukwakha. Yingakho kumele sidlule ebunzimeni ukuze isimo sibe ngcono,” kusho uMaharaj.
Ubale zonke izigameko ezaba nomthelela ekutheni leli ligcine likhululekile. Uthe kubalulekile ukuthi abantu bangawukhohlwa umlando ukuze babone ukuthi inkululeko ayifikanga kalula. Ulinganise ngesigameko lapho owayengumengameli uMnuz FW De Klerk amemezela ngokukhululwa kukaMandela. Uthe lolo suku alubanga umlingo kodwa kwadlulwa kobukhulu ubunzima ukuze lube yimpumelelo.
Umzukulu kaDkt John Langalibalele Dube uMnuz Langa Dube, ukhuthaze abafundi abebethamele umgubho ukuthi bangakuthathi kancane ukuthi uyisemkhulu wakha isikole ngoba efuna abamnyama bakhululeke. Uthe imfundo yiyona ezokhulula abamnyama ekuhluphekeni. UDube ugxeke indaba esematheni yokubuyiswa komhlaba, athe abanye abaholi babudedengu ngayo.
“Kuyakhulunywa nje ngokubuyiswa komhlaba kodwa alukho uhlelo olucacile ngalolu daba. Abaholi bezepolitiki akumele babe budedengu ngalolu daba, benyuse amathemba angekho kubantu. Lolu daba lubucayi futhi lungadala udlame esesadlula kulona,” kusho uDube.
UMnuz Thembinkosi Ngcobo oyiNhloko yezamaPaki, ezokuNgcebeleka namaSiko kuMasipala weTheku, uthe bakhethe ukwenza umgubho eNanda ngenxa yomlando njengoba nethuna likaDube likhona. Uthe bakhethe nokuthi balugubhe nabafundi ukuze bazi ngomlando. Amanye amaqembu esifundazweni enze eyawo imigubho kubalwa i-EFF ebiseHoward College e-University of KwaZulu-Natal, iNFP ebiseMlaza, i-IFP ibiseLindelani eNanda kanti iDA ibiseMtubatuba.