USredojevic uthembisa ukubuya ngamandla
UTHEMBISE ukubuya ngamandla ngesizini ezayo azoshubisa umbango kwiAbsa Premiership umqeqeshi we-Orlando Pirates, uMilutin “Micho” Sredojevic, ngemuva kokuphunyukwa yisicoco seligi kule sizini.
IMamelodi Sundowns ikhale yemuka nesicoco seligi ngemuva kokubhaxabula i-Ajax Cape Town ngo 3-1 eLucas Moripe Stadium, ePitoli, ngoMgqibelo ntambama.
Ngaleso sikhathi iPirates ibidudulana neCape Town City eKapa yagcina ihlulwe ngo 1-0. Igoli elibadlile lishaywe u-Ayanda Patosi esiwombeni sokuqala.
Umphumela obuzobeka Ezimnyama endaweni enhle yokuhlwitha isicoco, bekuzoba wukuthi iSundowns inganqobi bese zona zidlula kwiCity. Lokhu bekuzosho ukuthi kuzocaca ngemidlalo yokugcina ngoMeyi 12 ukuthi ngubani umpetha omusha weligi.
Noma ngabe kwenzekani ngemidlalo yokugcina, iPirates izoqeda endaweni yesibili kwi-log lapho ihleli khona ngamaphuzu awu-52. Lokhu kuyibuyisela kwiCaf Champions League yangesizini ezayo.
“Besakha kule sizini. Ngesizini ezayo ngiyathembisa ukuthi kuzoshuba kakhulu. Bebelokho behlezi esicongweni isikhathi eside bengaphazanyiswa yilutho. Nathi sizame ngakho konke okusemandleni. Ngiyamhalalisela uzakwethu uPitso Mosimane. Ngesizini ezayo sizobe sindawonye kwiChampions League,” kusho uSredojevic kwiSupeSport ngemuva komdlalo.
Selokhu iPirates ibuye ngamandla emzuliswaneni wesibili wemidlalo yeligi, uSredojevic ubengakaze ayivume eyokuthi ushisa umbango weligi.
Ubelokhu emile ekutheni umsebenzi wakhe kule sizini yokuqala wukwakha iqembu. Ulithathe lisuka endaweni ka-11 eliqede kuyona ngesizini edlule.
“Inhloso bekuwukubuyisa indlela yethu yokudlala. Sibe namasu ahlukene okuhlasela, udonga oluqinile kuphinde kube nozinzo eqenjini. Uma bekuthiwa siwasebenzise kangcono amathuba ethu emzuliswaneni wokuqala njengoba senzile ngowesibili bekuzoba ngcono. Ngibonga usihlalo, abadlali nethimba lezokuqeqesha, uRhulani (Mokwena) noBenson (Mhlongo) ngomsebenzi esiwenzile, yize singenza kangcono. Sizophusha ukuze senze okungaphezulu ngesizini ezayo.”