Asinangcindezi ngeseDiski Shield – oweChiefs
AKAZIBONI enengcindezi eyengeziwe yokudla umhlanganiso kwiMultiChoice Diski Shield umqeqeshi weKaizer Chiefs, uSundra Govinder.
Amakhosi azibekisele indawo kowamanqamu weDiski Shield ngemuva kokuguqisa iBloemfontien Celtic ngo 2-0 emdlalweni we-semi final obuseSugar Ray Xulu Stadium, eClermont.
Amagoli eChiefs abaselwe enethini nguYusuf Bunting no-Itumeleng Shopane. Amakhosi azodudulana neMamelodi Sundowns emdlalweni wamanqamu ngoMgqibelo ngo-12 emini eMakhulong Stadium, eTembisa.
ISundowns ithele othulini iLamontville Golden Arrows ngo 1-0 kwi-semi final yokuqala eSugar Ray.
Exoxa neSolezwe ngemuva komdlalo, uGovinder ukubeke kwacaca ukuthi ezakhe azinayo ingcindezi eyengeziwe yokunqoba isicoco njengoba iqembu elidala lingenzi kahle.
Amakhosi amadala sekuphele amasizini amathathu ehlulwa wukunqoba isicoco. Ithemba lawo lokunqoba isicoco selilele kwiDiski Shield.
“Akuyona into esithusayo ukufinyelela kowamanqamu. Yinto ebesiyihlelile ukuthi sifuna ukuyenza. Abafana balambile. Yonke imidlalo esiyidlalile sikhombisile ukuthi sifuna ukuyinqoba. Abafana basekwa ngayo yonke indlela futhi indlela abadlala ngayo iyakhombisa lokho. IChiefs ihlale ibheke ukwenza abantu bajabule. Asisoze senza ngamabomu ukuthi sidliwe. Njengoba isiqubulo sethu sisho singabafana bokuthula noxolo. Asinayo ingcindezi yokunqoba isicoco. Inhloso yethu wukupheka abafana abazophelela eqenjini elikhulu. Abafana abaningi esinabo sebekulungele ukudlala esigabeni esikhulu. Inhloso yethu enkulu wukwenza isiqiniseko sokuthi iqembu alingeni emakethe lithenge abadlali kule minyaka emithathu ezayo,” kusho uGovinder.
Iqembu elidala leChiefs lagcina ukuphakamisa isicoco ngo-2014/15 ngesikhathi lihlabana ngesicoco seligi neseMTN 8.
“Uma siyinqoba le ndebe kuzobe kuwukukhokhela abadlali ngokuzinikela kwabo kusukela kuqale isizini. La bafana bayilambele indebe. Noma yiliphi iqembu lifuna ukunqoba. ISundowns nayo izoza ngenhloso yokuzonqoba. ISundowns iyona enengcindezi,” kuphetha uGovinder.