Wenza ezibukwayo uPitso Mosimane
ULOKHU eqhubeke njalo uPitso “Jingles” Mosimane nokubhala kabusha umlando wakhe kunobhutshuzwayo kuleli.
Ukunqoba kwakhe isicoco seligi sesishiyagalombili neMamelodi Sundowns kumenze wasondela kubaqeqeshi asebenqobe izicoco zeligi ngaphansi kwePremier Soccer League (PSL).
ISundowns ibhaxabule i-Ajax Cape Town ngo 3-1 emdlalweni weligi obuseLucas Moripe Stadium, ePitoli, ngempelasonto.
Amagoli eSundowns abaselwe enethini nguKhama Billiat, Ricardo Nascimento noSibusiso Vilakazi kwathi ele-Urban Warriors labhajiswa ezintanjeni nguMusa Lebusa.
UMosimane ubenqoba isicoco sesithathu seligi. Ngo-2013/14 nango-2015/16, uMosimane nguyena obeshayela umkhumbi weBafana Ba Style ngesikhathi bekhala bemuka nesicoco seligi.
UTed Dumtru, ongasekho emhlabeni, uGordon Igesund noGavint Hunt yibona abaphethe izicoco eziningi zeligi kusukela kwasungulwa iPSL ngo-1996/97.
Lezi zingwazi zabaqeqeshi ziphethe izicoco ezine zeligi umqeqeshi ngamunye. NjengoMosimane, uDumitru no-Igesund bake bayibamba kwiBafana baphinde banqoba izicoco zeligi neSundowns.
UDumitru wanqoba isicoco seligi neSundowns ngo-1997/98 nango-1998/99 kwathi u-Igesund wasinqoba neSundowns ngo2005/06.
UMosimane usesele ngesicoco esisodwa ukuze abalwe ohlwini olulodwa nala baqeqeshi abahlonishwayo. Ngaphandle kwesicoco seligi, uMosimane usenqobe isicoco seNedbank Cup, Telkom Knockout, Caf Champions League neseCaf Super Cup selokhu efike kwiSundowns ngo2012.Sisodwa kuphela isicoco angakaze asinqobe selokhu ejoyine iSundowns. Leso sicoco yiMTN 8 okuyiso angakaze asinqobe naBafana Ba Style. Ukunqoba izicoco yinto yakhe uMosimane kwazise nangesikhathi esashayela umkhumbi weSuperSport United, ngaphambi kokuthi ajoyine iBafana Bafana, wakhala wemuka nesicoco seSAA Super Eight nese-ABSA Cup.