Kulokoza inhlansi yethemba kwiKings
KUBUYE inhlasi yethemba kwiReal Kings yokuthi kusengenzeka ingene kumaPlay Offs okukhuphukela kwi-Absa Premiership.
Lokhu kwenzeke emuva kokuthi leli qembu laseThekwini lithole amaphuzu amathathu lishaya Umthatha Bucks ngo 2-0 eMthatha Stadium, emdlalweni weNational First Division (NFD), izolo ntambama.
IKings ibiwadinga la maphuzu kulandela ukudlala ngokulingana uxhaxha lwemidlalo nokuyehlisele endaweni yesine kwi-log.
Ngemuva kwalo mphumela isahleli kuyona le ndawo ngamaphuzu angu-45, okusho ukuthi seyehlukaniswe ngamaphuzu amabili neBlack Leopards esendaweni yesithathu, yona ehlulwe ngo 2-1 ngompetha beNFD, iHighlands Park.
IKings isidinga ukuthi inqobe umdlalo wayo wokugcina neCape Town All Stars eKing Zwelithini Stadium, eMlazi, bese kuthi iLeopards ishaywe kowayo.
Emdlalweni wokugcina iLeopards izobhekana neJomo Cosmos ebambe indawo yesibili. Uma la maqembu edlala ngokulingana, bese iKings inqoba, sekuzosetshenziswa umehluko wamagoli, okwamanje ovuna iLeopards.
Aqembu Azoqeda endaweni yesibili neyesithathu azodlala kweyokuhlunga neqembu eliqede endaweni ka-15 kwi-Absa Premiership.
ICosmos ishaye iSuper Eagles okwenze yayisimenda indawo yayo yamaPlay-Offs. EzikaMjomane zidliwe yizembe kwiPremieship kumasizini amabili edlule.
IRichards Bay FC ithathe igxathu ekuvikeni izembe ngesikhathi iguqisa Ubuntu Cape Town ngo 2-1 emdlalweni obuseMhlathuze Sports Complex khona izolo.
Womabili la maqembu azabalazela ukuvika izembe. IBay iye emdlalweni wayizolo ihlezi endaweni yesibili ukusuka emsileni kodwa ngemuva kwamaphuzu amathathu ewatholile yenyukele kweka-13.
UBuntu bona busahleli kunombolo-15 ohambisana nezembe. UMthatha Bucks wona usuvele ugawulwe yizembe, okusho ukubuyela kwi-ABC Motsepe League ngesizini ezayo.
IBay kudingeka ukuthi iwine umdlalo wokugcina neMbombela United ekuhambeni ukuze isinde ezembeni noma imincele ukuthi Ubuntu budliwe yiTshakhuma yaseLimpopo. Yonke le midlalo yokugcina izoba ngeSonto ngesikhathi esifanayo. Elinye iqembu laKwaZulu-Natal, Uthongathi FC, nalo alikasindi ezembeni njengoba belingana neBay ngamaphuzu angu-31.
Imiphumela ye-NFD: Jomo Cosmos 3-2 Super Eagles; Cape Town All Stars 1-1 Royal Eagles; Richards Bay 2-1 Ubuntu; Witbank Spurs 1-0 Mbombela United; Highlands Park 2-1 Black Leopards; Mthatha Bucks 0-2 Real Kings; Tshakhuma 2-1 Uthongathi; University of Pretoria 2-3 Stellenbosch.