Kukhala imenenja yoMvoti FC ngoPhakathi
IYABALISA imenenja yoMvoti FC uBongani Msomi ngokudlula emhlabeni komqeqeshi wayo uBheka Phakathi oshone engozini yemoto eyenzeke eGreytown izolo ekuseni.
UPhakathi ubematasa neqembu belungiselela ukuyodlala kumaPlay Offs e-ABC Motsepe League ngemuva kokudla umhlanganiso kwiligi yeSafa KwaZulu-Natal.
“Zibuhlungu izindaba zokudlula emhlabeni kukaBheka Phakathi. Wenze umsebenzi omkhulu kakhulu. Ngesizini edlule usibeke endaweni yesibili ekubeni efike isizini iphakathi kanti kulokhu usibeke endaweni yokuqala.
“Le nto yenzeke ngesikhathi esibi silungiselela amaPlay-Offs. Sihlalele ethembeni lokuthi abadlali bazokwazi ukwenza obekufunwa nguBheka ngoba sebeyazi ukuthi yini elindeleke kubona. Sithi akalale ngokuthula. Okwamanje besingakasithathi isinqumo sokuthi ubani ozovala isikhala sakhe ngoba le nto iseyintsha,” kusho uMsomi.
Uveze ukuthi ingozi yenzeke ngemuva kokuthi imoto iqhunyelwe yisondo. Uthe uPhakathi ubehamba nabangani bakhe ababili ngesikhathi kwenzeka ingozi kodwa bona basinda.
UPhakathi ubedlala esiswini nasemuva ngezikhathi zakhe esayibamba enkundleni. Wayengomunye wezethenjwa ze-Orlando Pirates neLamontville Golden Arrows.
Ngaphambi kokuqeqesha uMvoti wayeyiphini lomqeqeshi kwiRoyal Eagles edlala kwiNational First Division (NFD). Uphinde waba yiphini kwi-Arrows ngesikhathi beyikhuphula noShaun Bartlett isuka kwiNFD iya kwiPremiership. Phezu kwalokho uke waba wumhlaziyi webhola kuKhozi FM.