UPitso ucabanga ukuthatha ikhefu
USIKAZA ukuthatha ikhefu kwezokuqeqesha, uPitso “Jingles” Mosimane, ngempelasonto oqophe umlando ewinisa iMamelodi Sundowns isicoco se-Absa Premiership sesishiyagalombili.
ISundowns iwine iligi okwesithathu eminyakeni eyisihlanu iqeqeshwa wuMosimane ngemuva kokuhlula i-Ajax Cape Town ngo 3-1 eLucas Moripe Stadium, ePitoli ngoMgqibelo ntambama. Amagoli eSundowns ashaywe nguKhama Billiat, Ricardo Nascimento kuyiphenathi noSibusiso Vilakazi. Ngaphezu kwalokho amaBrazillians asedlulele esigabeni samaqoqo kwiCaf Champions League ayinqobile ngo2016.
UMosimane ucabanga ukukhuluma nomndeni wakhe mayelana nokuthatha ikhefu lonyaka ngoba sebebhekane nokuningi. Emasontweni adlule unkosikazi kaMosimane usinde edunwa imoto iRange Rover esangweni lomuzi wabo eHoneydew, eGoli.
“Kuhle ukuthi siwine iligi, ngifuna sifinyelele kweka-10, sifake enye inkanyezi ngaphansi kwebheji. Lokho kubalulekile. Kodwa ngikhathele, ngiqinisile ngalokho. Sekuphele iminyaka emine singaphumuli ekupheleni kwesizini. Ngikhuluma nomndeni wami ukuthi ngiphumule noma unyaka owodwa. .”
“Sekuphele iminyaka emine, ngifaka ingcindezi kubadlali. Bangakutshela, ngengcindezi yokuwina kwiSundowns,” kusho uMosimane.
“Yithina kuphela iqembu eliphumele obala ngokuthi sifuna ukuwina iligi. Sithole lokhu ebesikade sikufuna. Akekho ongakhuluma ngendaba yokufuna iligi ngoba akekho owathi uyayifuna. Uma uyifuna futhi wenza ngendlela yokuthi uyayifuna, uzoyithola. Ngiyazi ngamanye amaqembu lapho ingekho ingcindezi yokuwina iligi. Kodwa kwiSundowns kufanele uwine yonke imidlalo, wonke amasonto.”
UMosimane uthe nakuba bazobe sebadlalela ukuqedela isizini uma sebebhekene neBloemfontein Celtic ngoMeyi 12 kowokugcina kwiligi kodwa bazowuhlonipha umdlalo.
Nokho ugcizelele ukuthi kuzomele bakuhlelele ukuthi banemidlalo yeCaf Champions League. NgoMgqibelo iSundowns izodlala ekhaya neWydad Athletic emdlalweni wamaqoqo eChampions League. Uzolandelwa owasekuhambeni neHoroya ngoMeyi 15.
“Kufanele ukuqonde ukuthi sizobhekana neHoroya emuva komdlalo waseBloemfontein, ngoLwesibili siya eTogo. Sizobhekana kanjani nalokho. Kuyinkinga, sizophuma kanjani eBloemfontein ngoMgqibelo, ngaliphi ibhanoyi? Sidinga okungenani amahora angu-48 ngaphambi komdlalo. Sifika eTogo ebusuku sizodlala ngakusasa. Sizokwenza konke okusemandleni ukuhlale sikwiChampions League ngoba sisebenza kanzima,” kusho uMosimane.