Bafuna ukuqwaqwada ezinye futhi
SIFUNA ukuqopha umlando isikole samabanga aphansi i-Ekuthuleni Primary, esiKwaBester eNanda esesiphumelele amahlandla amathathu umncintiswano wokuqoqa imfucuza yezigubhu zocwazi, amaphephandaba namabhuku amadala.
Lesi sikole sizishaye zonke emakhanda izikole zakuleli ezingenela umncintiswano wakwa-Coca Cola Beverages South Africa wokuqoqa izigubhu ezingasasebenzi ukuze zibuye zisetshenziswe.
Uma singadla umhlanganiso kulo nyaka kuzoba kuwunyaka wesine siwina iminyaka ilandelana njengoba lo mncintiswano usagxile ezikoleni zamabanga aphansi kuleli. Sizihlula zonke izikole emcimbini oba seGoli lapho kutonyulwa isikole esisuke sicoshe kakhulu imfucuza saphinde sakha nohlelo oluzishaya zonke emakhanda lokufundisa ngemfucuza.
Uthishanhloko walesi sikole uMnuz Sambulo Khalala, uthe bafuna ukuqopha umlando ngokuwina iminyaka ilandelana njengoba baqala ukudla umhlanganiso ngo-2015.
Uthe baqala ukungenela umncintiswano ngo-2014 unyaka usuphakathi befuna ukubona ukuthi kwenziwani.
“Ngo-2015 sibe sesibiza umhlangano sakha ithimba elizosebenza indaba yokuthi siqoqe udoti. Umphakathi uyingxenye yalolu hlelo ngoba sawutshela ukuthi sidinga ukuthi nawo ubambe iqhaza. Izingane zabe seziqala zaqoqa, kuyancintiswana manje ngokuqoqa izigubhu ezindala, amaphephandaba noma amabhuku angasasebenzi,” kusho uKhalala.
Uthe ithimba lothisha abahlukene basebenza ngokuzikhandla njengoba kwabona bagcina bengasalali becosha lezi zigubhu.
“Asizibheki izigubhu. Kuyaziwa nje emphakathini ukuthi uma kunomcimbi izigubhu ziyabekwa. Ngalapho othisha behlala khona nakhona kuyaziwa ukuthi izigubhu asizibheki, siyazibekisa,” kusho uKhalala.
Omunye wothisha ohola lo mkhankaso uNkk Lindiwe Khumalo, uthe uma kuke kwafakwa itende banikela khona beyocela ukubekelwa izigubhu.
“Le nto isiphenduke ihlaya, umyeni wami useze angafuni ukuhamba nami uma siya emcimbini ngoba abantu bethi bephuza i-drink ngibe sengithe njo amehlo ami kuleso sigubhu. Bathi beqeda ngibe ngisicela, ngihambe naso. Lokhu kutshengisa khona ukuthi sonke sizinikele ngokucosha. Sekuyaziwa ukuthi uma kunemisebenzi izigubhu iyabekwa ngoba siyazilanda. Izimoto zothisha uma kuyizimpelasonto zifika zinyinyitheka izigubhu nemfucuza,” kusho uNkk Khumalo.
Uthe baze bafundise ngakho ukuqoqwa kwalezi zigubhu kuzona zonke izifundo.
“KwiMaths, isiZulu nakuzona zonke izifundo ikhona into esiyifundisayo mayelana nokuqoqwa kwalezi zigubhu. Asiwini nje ngokuthi sicoshe kakhulu kodwa siwina goba unyaka nonyaka kudingeka siqhamuke nento esizoyenza ngazo lezi zinto esizicoshile. Sakha ifulegi lakuleli, umuzi wowayenguMengameli wezwe (uMnuz Jacob Zuma) eNkandla nezinye izinto eziningi ezehlukene esiwina ngazo ngoba kudingeka siveze ukuthi siyakuqonda esikwenzayo.”
UKhalala uthe ngo-2015 bawina uR72 000 kwathi ngo-2016 bawina uR69 000.
“Le mali ayizi esikoleni kodwa kuthiwa asikhethe into esifuna ukwenzelwa yona. Sakhetha ukwakhelwa inkundla ye-netball, volleyball neye-tennis. Ngonyaka odlule siwine uR69 000 sisacele ukuthi sakhelwe umpheme lapho abazali bezokwazi ukuhlala khona uma kunemihlangano noma izulu lina,” kusho uKhalala.
Uthe bayahlomula nabafundi abacosha kakhulu ngemiklomelo.
“Kunomfundi uSibongiseni Buwa, usefunda eJG Zuma High uyena obecosha kakhulu. Ubenanetrolley abeyisebenzisa ehamba yonke iNanda ecosha. Ngendlela abecosha ngayo namanje ubuyile wacela ukuthi aqhubeke noma engasafundi lana ngoba unothando lwalento ayenzayo.”
Uthe umphakathi uze ubathinte noma besemakhaya uma kukhona abantu abafuna ukuthatha izinto ezisuke zicoshwe abafundi.
“Kumele ngisho ukuthi buhle ubudlelwano nomphakathi ngoba uma sisemakhaya basishayela ucingo uma kukhona abantu abafuna ukuthatha lokhu okucoshwa abafundi. Kuyasisiza lokhu ngoba asikwazi ukuba esikoleni nangempelasonto ngakho buhle ubudlelwano esinabo nomphakathi,” kuqhuba uKhalala.
Uthe lesi sikole sinabafundi abangu-2064, othisha abangu-56 kanjalo namagumbi okufundela angu-40.
“Sikleliswe saba nguQuintile 4 (okuyisikole esikhokhisa imali yokufunda) ekubeni esingumakhelwane asikhokhisi. Manje lento isiqhatha nabazali noma imali yesikole ngonyaka iwuR100 kodwa abazali baze basole ukuthi siyababamba ngoba uma izingane zabo seziyofunda amabanga aphezulu azikhokhi kodwa la kuthina ziyakhokha. Siyafisa umnyango uyilungise ngoba iyinkinga indaba yokungakleliswa ngendlela kwezikole ngoba isiqhatha nomphakathi.”
Uthe baze babe nezinye izindlela zokuqoqa imali ukuze bakwazi ukwenza izidingo zesikole.