Amakhosi aseqalile ukuthungatha umqeqeshi
ISIQALILE ukuthungatha umqeqeshi omusha iKaizer Chiefs ehlukane noSteve Komphela ngemuva kwezidubedube nobuhixihixi baseMoses Mabhida Stadium, eThekwini, ngenyanga edlule.
Amakhosi akhishwe yiFree State Stars ngo 2-0 kwi-semi final yeNedbank Cup eMabhida. Abalandeli bavuke umbhejazane bangena ngodli enkundleni baphinde babulala nempahla enkundleni.
Isolezwe lihabule ngomthombo walo othembekile ukuthi iChiefs isiqalile kuthungatha umqeqeshi omusha ozovala esikaKomphela.
“UBobby (Motaung) uke wathinta enye imenenja ehlonishwayo. Uyicele ukuthi imsize imthungathele umqeqeshi oyiNgisi oseqophelweni eliphezulu. Le menenja sengathi isimtholile umqeqeshi embona ukuthi ufanelwe wukuqeqesha iChiefs. Njengamanje into esisele wukuthi le menenja ihlangane naye bese izwa ukuthi angathanda yini ukuzoqeqesha eNingizimu Afrika. Uma ethi angaqeqesha eNingizimu Afrika, le menenja izobe isibuyela kwiChiefs ne-CV yakhe. Izikhulu zeqembu yizona-ke ezizobe sezithatha isinqumo sokuthi ziyambiza kwinhlolokhono noma cha,” kusho umthombo osondelene nale menenja.
UKomphela ushiye kuMakhosi ngemuva kwamasizini amathathu enganqobi sicoco. UPatrick Mabedi, esizwa u-Arthur Zwane, nguyena obambile kuze kuphele isizini.
“Ungathuki futhi uma uStuart Baxter engathushuka kwiChiefs. UBaxter akaneme kwiBafana Bafana. Ngakho ngeke kumangaze uma engashiya bese ebuyela kwiChiefs. Omunye umqeqeshi engimaziyo ukuthi uyawufuna lo msebenzi nguLuc Eymael. Okwamanje akukho okubambekayo ngoba into kaKomphela yinto eyenzeka manje,” kusho lo mthombo.
UBaxter wagila izimanga kuMakhosi. Uhlale amasizini amabili wakhala wemuka nezicoco ezimbili ze-Absa Premiership, Nedbank Cup neseMTN 8. Lo mqeqeshi, ojoyine iBafana ngesizini edlule esuka kwiSuperSport United, uhlulwe yisicoco seTelkom Knockout kuphela ngesikhathi sakhe kwiChiefs.
Ngesikhathi uMotaung eqinisekisa izindaba zokushiya kukaKomphela wathi iqembu lisazobiza isithangami nabezindaba lapho kuzonatshwa khona ngokuzokwenzeka kubhekwe kwisizini entsha.
IChiefs isiphosa iso layo phesheya nje, uKomphela ubengumqeqeshi wokuqala omnyama nowakuleli ukuyicija ngaphansi kwePremier Soccer League.
Khonamanjalo imibiko yelinye lamaphephandaba angempelasonto iveze ukuthi abaphathi bahlongoza ukubuyisa uDoctor Khumalo azoba yiphini lanoma ngubani ozothatha izintambo.
UKhumalo uyinhloko yosomaqhinga kwiBaroka FC ayijoyine ekuqaleni kwesizini kulandela ukushiya Amakhosi, abesehlale kuwona iminyaka engaphezulu kuka-30.