Umaskanda uhleka usulu eyokuthwala
SIZIPHENDULE ihlaya izinsolo zokuthi sithwele isihlabani somculo kamaskandi uKhuzani ‘Indlamlenze’ Mpungose, sikhuluma nabalandeli baso emcimbini obuseNongoma Gardens eMbonjeni ngempelasonto.
“Siyabangena omaskandi. Kusekuncane lokhu. Bathi sithwele, bayoze bangethule. Uke ubone wehlule umuntu ngengoma, aze athi uthwele?” esho maqede waphela yinsini.
Ukhuluma kanjena nje uKhuzani, kunenkulumo esabalele ezinkundleni zokuxhumana lapho kuzwakala amazwi omaskandi abaziwayo, omunye owaseMtubatuba, omunye owaseNkandla, bekhuluma ngokuthi uKhuzani uthwele. Eziphendulela uKhuzani uthe akathwele kodwa omaskandi ubagqilaza ngengoma. Ube esecula ingoma yakhe esecwecweni elisha elithi Inhlinini Yoxolo esihloko sithi Abasibuzi Ukuthi Senzangani. Uthe abantu bathuswe ukuwola kwakhe imiklomelo eminingi, okubalwa kuyo ama-gold disc, izizumbulu zemali, izinkomo, ukuqashwa kakhulu emicimbini nokuqokwa kumaSama. “Ngiyanicela balandeli bami nizibambe ziqine ngoba kukhulu okuzayo. Ningabe nisahlehlela emuva ngoba zizojabula izitha zami,”kusho iNdlamlenze. Uthe kulo nyaka uzimisele ngokudla umhlanganiso kwiNgqwele Kamaskandi yeSolezwe nokuvala ngehlahla kwiMpucuzeko futhi agcwalise phama iMoses Mabhida Stadium, eThekwini.
Emcimbini uKhuzani utheleke phakathi kwamabili eholwa ngamaphoyisa nezinduna zabalandeli bakhe iBlue Nation, ebebengangoZulu uye eMakheni, kuluhlaza yonke indawo.
UKhuzani uvumbulule isibabuli somculi obukeka ezodlisela abaningi ogageni, uMzukulu wakwaCeza, oshiye izihlwele zisahalela impinda.
UMzukulu noDumakahle sebezoqopha enkampanini kaKhuzani iNdlamlenze Group Production.
Abanye abahlanyise izihlwele Ijong’elihle, uMahosha, Magic Voice neqembu lekwaito iDTM Rocks.
Abaphathi beNongoma Gardens bakujabulele ukufika kukaKhuzani futhi bathi bebeqala ukubona kugcwele kanje kule ndawo okuvamise ukuba nemicimbi yemishado esezingeni elicokeme.
Bathe bafuna ibe sezingeni leBotanic Gardens yaseThekwini neYadini eMlaza.