Uvalelise kweyePhasika ngamazwi angajwayelekile
“SENGIKUTHOLILE ebengikade ngikufuna”
Lawa ngamazwi okuvalelisa okuvela ukuthi ashiwo ngobengumethuli wezinhlelo zethelevishini, u-Akhumzi Jezile, evakashe enkonzweni yePhasika ebandleni okukhonza kulona iqembu lomculo wokholo iMasibuyele KuJehova, i-Independent Baptist Church eMpumalanga.
U-Akhumzi (29) ufihlwe ngoMgqibelo eWest Park emuva kwenkonzo ebiseRhema Bible Church, eRandburg, eGeuteng. Udlule emhlabeni ngeledlule emuva kokuthi imoto abebehamba ngayo nabangani bakhe ibe sengozini eQueenstown, e-Easterm Cape. Kushone nobengumculi uSiyasanga Kobese, Thobani Mseleni noSikhumbuzo Mbuthuma. Umngcwabo ka-Akhumzi ubunabaculi nabethuli bezinhlelo zethelevishini, uNgqongqoshe wezobuCiko namaSiko nezeMidlalo kuzwelonke uMnuz Nathi Mthethwa nowase-Eastern Cape uNksz Pemmy Majodina.
Izikhulumi zithe ubengafihli ukuthi uyakholwa futhi konke okwenzeka empilweni yakhe kuwumusa kaJehova.
“Samazi u-Akhumzi ngoPercy (Vilakazi) ebesisebenza naye siqopha icwecwe elithi Mbongeni ngo2015. Ubethi uma esibona ajabule. Silahlekelwe kakhulu.
“Ngaphambi kwePhasika uphoqe umngani wakhe uPercy ukuthi ufuna ukuzokhonza nathi. Wasimangaza ngendlela ayecula ngayo, kubonakala ukuthi kukhona indawo afuna ukuyigcwalisa. Emuva kwenkonzo wathi usekutholile abekufuna. Besingazitsheli ukuthi uzosivalelisa,” kusho umholi weMasibuyele KuJehova, uNkk Fifi Mabuza.
U-Akhumzi uzakhele ugazi ethula izinhlelo kwi-YoTV eminyakeni edlule, wadlulela nasekudlaleni imidlalo yethelevishini okukhona kuyona othi Khululeka Siyavota abedlala kuwona nezinkakha ezifana noJoe “Sdumo” Mafela ongasekho.
Kube nomunyu Inkosi Nkosikathi Jezile, ichaza ukuthi yayingaboni ukuthi uyena u-Akhumzi ngesikhathi iyobona isidumbu emakhazeni. Kuvele ukuthi imoto ababehamba ngayo yashayiswa yisigadla semoto ababephambana nayo, yasuka ukhakhayi.
“Bangivulela yena, ngaphika ngathi akuyena u-Akhumzi. Ngacela bangivulele amafasitela, ngambheka ezithweni, okuyilapho ngikholwe khona ukuthi uyena,” kusho iNkosi Jezile.