Bashiye amawele abashone engozini
UMNDENI wendoda nonkosikazi abashone engozini yomgwaqo ngesikhathi behudulwa yiloli ngaseMbali eMgungundlovu ukhala ngokusala kwabafana abangamawele abaneminyaka engu-16 beyizintandane.
UNkk Duduzile noMnuz David Lekhoaba bashone engozini ebandakanya izimoto ezimbili neloli ngoMgqibelo.
Le ngozi kuthiwa yenzeke ngasemarobhothini kaSasol ngaseSlaangspruit, eMbali.
Kuthiwa imoto yezithandani okuthiwa bezingahlukani, ihudulwe yiloli ibanga elide. Zikhishwe abezimo eziphuthumayo, sekusikwe ukhakhayi lwemoto, sezishonile.
Udadewabo ka-Lekhoaba, uNkk Thembekile Msomi uthe namanje abazi nokuthi bayamukele kanjani le nto ebavelele.
“Umfowethu nomakoti wakhe bebeya emsebenzini edolobheni ngesikhathi beshayiswa yiloli. Ngokolwazi esisalutholile bebeserobhothini ngesikhathi kuqhamuka iloli eliphelelwe amabhuleki, lingasakwazi ukuma. Lifike lashayisa enye imoto ladlula. Lena ebihamba umfowethu, liyishayisile, lase liyayihudula ibanga elide. Bashonele khona lapho,” kusho uNkk Msomi. Uthe okubuhlungu kakhulu wukuthi laba bashiye izingane zabo zodwa. “Bashada eminyakeni engu-16 edlule, umakoti wayevele ekhulelwe. Bebenezingane ezimbili kuphela, amawele abafana. Ngomzuzu nje bahanjelwe wunina noyise. Kunzima nokukhuluma ngale nto,” kusho uNkk Msomi. ULekhoaba ubesebenza esitolo esihamba phambili sezimpahla zabesilisa uNkk Lekhoaba esebenza esalon enxanxatheleni yezitolo.
Okhulumela amaphoyisa KwaZulu-Natal uLt. Col Thulani Zwane ukuqinisekisile ukuthi amaphoyisa ase-Alexandra Road avule icala lokubulala ngokungenhloso.