Ubewukhonzile umndeni uPhakathi
UCHAZWE njengendoda ebithanda umndeni wayo uBheka “Mlisa” Phakathi .
UPhakathi udlule emhlabeni ngoSonto engozini yemoto eGreytown.
Ushiye emhlabeni izingane ezine uLwazi, Luyanda, Kwanele noKhayelihle.
Ushone esecija uMvoti FC ogijima ku-ABC Motsepe League. Leli qembu yilona eliyomela iKwaZulu-Natal kumaplay off okuhlungela ukuzibekisela indawo kwiNational First Division (NFD).
Umphathi weRoyal Eagles edlala kwiNFD, uShauwn Mpisane oke wasebenza noPhakathi uthe le nsizwa ibiwazisa umndeni wayo.
“Amanda, uBheka ukuthandile. Ubewazisa umndeni wakhe. Ngaso sonke isikhathi uma sisekhempini ubethi sihlalo (Sbu Mpisane) nawe sekela sihlalo ngicela ukuxhumana nomndeni wami. Ubeyisibonelo esihle sendoda ethanda umndeni. Into ebihamba phambili kuBheka umndeni nebhola,” kusho uShauwn. Isidumbu sikaPhakathi sifike eYellowwood Park Civic Hall ngo-10.25 ekuseni.
Ngaleso sikhathi izingwazi zikanobhutshuzwayo besezilindile ngaphandle ukwamukela iqhawe lazo.
Phakathi kwezingwazi ebezisenkonzweni yomngcwabo kaPhakathi kubalwa uNhlanhla Mshibe ayibamba naye kwiLamontville Golden Arrows, Sithembiso Ngcobo wodumo kwiKaizer Chiefs, Manqoba Mkhize owayegijima kwi-Chiefs nakwiArrows, Zola Luthuli oyi-kit manager kwiMaritzburg United noJaphet Zwane odume kuMaZulu nakwiMoroka Swallows.
Kule nkonzo kaPhakathi kuphinde kwaba nomzuzu wokuhlonipha uLuyanda Ntshangase obegijima kwiMaritzburg United.
Udlule emhlabeni ngoLwesihlanu ngemuva kokuhlala isikhathi eside esibhedlela kulandela ukushaywa wumphezulu.
Ngendlela obekugcwele ngayo ehholo kuze kwaphoqa ukuthi abanye bame.