Bafuna iSJ Smith ibizwe ngoBheka Phakathi
BAFUNA ishintshwe igama iqanjwe ngoBheka Phakathi inkundla iSJ Smith Stadium eseWema.
Lokhu kuvele ngesikhathi kukhuluma uMjay Maphumulo obephethe uhlelo.
UPhakathi udlule emhlabeni ngoSonto engozini yemoto. Ufihlwe izolo emini emathuneni aseLamontville. “Uma nifuna ivoti lethu, kumele nishintshe inkundla iSJ Smith Stadium ibizwe ngoBheka Phakathi. Ngonyaka ozayo wukhetho (lukazwelonke) ngakho sicela niqambe inkundla ngoBheka Phakathi ngoba asazi ukuthi ngubani u-SJ Smith.”
Inkundla yonke ivele yavungama ikhombisa ukujabulela isiphakamiso sikaMaphumulo. IMeya yeTheku, uNkk Zandile Gumede, nongqongqoshe wezeMidlalo, amaSiko nokuNgcebeleka, uNkk Bongi Sithole-Moloi, bathumele izixoliso ngokungaphumeleli.
ISJ Smith Stadium isetshenziswa kakhulu ngamaqembu aku-ABC Motsepe League.
Usihlalo woMvoti FC, uBonginhlanhla Gwala, uthe akalilahlile ithemba ngokuphumelela kuma-play off eLimpopo ngenyanga ezayo.
“Emidlalweni ewu-28 uBheka unqobe ewu-23, wadlala ngokulingana kwemine wase edliwa kowodwa. UBheka ubeyikho konke eqenjini. Ayikho inkinga abehlulwa wukuyisombulula. Besifuna ukuyodla ubhedu kuma-play off futhi sisaya lapha ukuyonqoba,” kusho uGwala.
I-Arrows izichithile izinsolo zokuthi iyishaye ngesithende inkonzo yesikhumbuzo kaPhakathi.
UMandla Ncikazi, oyiphini likaClinton Larsen kuBafana Bes’thende, uthe:” UBheka ubenenkani enhle. Ubeyimela into yakhe. Ubenesibindi esisabisayo. Ngisho esengasekho kwi-Arrows kodwa ubesalithanda iqembu. Asizange siyishaye ngesithende inkonzo yesikhumbuzo kaBheka. Yilokho engifuna ukukucacisa. Into eyenzekile wukuthi kushayisane izikhathi. “