‘I-ANC iyilungele ingqungquthela’
ILUNGU lesigungu esiphezulu kwi-ANC elijutshwe ukuba libheke ukusebenza kwesifundazwe iKwaZuluNatal, uNkk Edna Molewa, liyakuchitha ukuthi uKhongolose esifundazweni unezinkinga ezinzima ezingenza ukuthi ingqungquthela yesifundazwe ingabikhona.
Ekhuluma esithangamini nabezindaba eMeander Manor Hotel, eSalt Rock, izolo ngemuva kwengqungquthela yesifunda iGreater KwaDukuza, uNkk Molewa uthe ubuholi bukazwelonke bufike esifundazweni buzohlola isimo samagatsha nezifunda bathola ukuthi iqembu likulungele ukuthi lingaba nengqungquthela yesifundazwe.
“Nakuba zikhona izikhalo kodwa ngezamagatsha ambalwa ezifundeni ezehlukene ezingeke zadala ukuthi kumiswe ingqungquthela yesifundazwe,’’ kusho uNkk Molewa.
Uthe akukho okuphambene abakwenzile kodwa balandele yonke imigomo ekumthethosisekelo weqembu mayelana nezingqungquthela.
“Umgomo weqembu uthi ukuze kube nengqungquthela kumele u-70% wamagatsha ube sesimeni esihle. Cishe zonke izifunda zingaphezu kwalesi sibalo esifunekayo.”
Uthe ingqungquthela yesifundazwe izoba khona ngaphambi kokuphela kukaMeyi.
“Bekulindeleke ukuthi ingqungquthela ibe ngempelasonto kaMeyi 18-20 kodwa lokho kubukeka kungeke kusenzeka ngoba kukhona izifunda ezizobe zihlangene. Akukwazi ukuthi kungaba nengqungquthela yezifunda kube kuneyesifundazwe.”
Uthe noma ngabe kuthiwa kukhona izifunda ezinenkinga lokhu ngeke kuyiphazamise ingqungquthela yesifundazwe.
“Izithunywa kaziyi engqungqutheleni yesifundazwe ngoba zithunywe yizifunda zazo kodwa ziya ngoba zithunywe ngamagatsha azo.”
Uncome ingqungquthela yaseGreater KwaDukuza wathi ibe yimpumelelo enkulu wanxusa zonke izifunda ezisazokhetha ukuthi zisike iphethini kwaDukuza.
Ubongele nobuholi obusha besifunda iGreater KwaDukuza wathi uyathemba ukuthi buzokwazi ukwenza umsebenzi ngendlela.
Ingqungquthela yaKwaDukuza ikhethe ubuholi obusha ngo-elethu engqungqutheleni ethathe izinsuku ezimbili.
UMnuz Ricardo Mthembu obevele enguSihlalo wesifunda uphinde wabuyela esikhundleni sakhe okwesithathu. Uke waba nguSihlalo we-ANCYL esifundeni.
UMthembu uthe ujabule ngokuthi amaqabane aphinde amthembe ngokuthi usengakwazi ukuwahola.
Uthe uzosebenza kanzima ukuzama ukuqeda ukwehlukana okukhona kumalungu.
“Ukwehlukana okukhona enhlanganweni kubhebhethekiswa wubuholi, yithina futhi esisukayo siyoxova amagatsha,” kusho uMthembu.
Uthe uzimisele ngokusebenzisana nesigungu sakhe ukuyisa uKhongolose phambili.
Ingqungquthela yaKwaDukuza ngeyokuqala KwaZulu-Natal ngemuva kokuthi ubuholi bukazwelonke bathatha isinqumo sokuthi zime kancane.
Ngempelasonto ezayo kulindeleke ukuthi kube neyezifunda ezine kanye kanye okukhona kuzo iMusa Dladla, Far North, Emalahleni neNkosi Bhambatha.
Ngempelasonto ezolandela kulindeleke ukuba kube neyeMoses Mabhida, Abaqulusi, Harry Gwala neLower South Coast. Ukuphumelela kukaMthembu esifundeni iGreater KwaDukuza kusho ukuthi uhlangothi lukaMnuz Sihle Zikalala lusahamba phambili ngo 1-0, njengoba kulungiselelwa ingqungquthela yesifundazwe.
Kodwa akwaziwa ukuthi izozala nkomini kulezi ezinye izifunda eziyisishiyagalombili okusamele zihlangane.