Bashaqekile kuminza inhlambi
USASHAQEKILE umndeni wesitshudeni saseNyuvesi yaKwaZulu (UKZN) esiminze eMidmar Dam eMgungundlovu siziqeqesha neqembu lasenyunivesi.
USizophila “Phila” Mahlobo (24) ubenza iziqu zeMasters ezifundweni zamanzi i-Hydrology e-UKZN futhi ezihlanganisa ezemidlalo ezehlukene, okubalwa ukugwedla nokugijima.
NgoMgqibelo kuthiwa ubeziqeqesha neqembu lesikole lokugwedla ngesikhathi eduka emanzini.
Kubizwe abatakuli bamthola ngaphansi kwamanzi eseshonile.
Unina omncane uNkk Khanyi Mthethwa uthe kusenzima ukukholwa ukuthi ithemba labo ebeliwathanda amanzi lishone ngale ndlela.
“Ngithole ucingo izolo (ngoMgqibelo), abasesikoleni sakhe bengitshela ukuthi uminzile. Angizange ngikholwe ngoba ngiyazi ukuthi uyakwazi ukubhukuda futhi amanzi uwakhonzile.
Namanje sisashaqekile siwumndeni asikholwa. Siyoze sibe nesiqiniseko uma sesihlonze umzimba wakhe ngoMsombuluko (namhlanje),” kusho uNkk Mthethwa.
Uthe umufi ubeyithemba labo bebheke lukhulu kuyena.
“Ubeyisimanga sengane njengoba ubeziphethe kahle nemfundo eyibeke phambili. Besimbiza ngodokotela ngoba sibona indlela aphokophele ngayo imfundo. Ubesemncane kodwa esenza izifundo zeMasters. Ekhaya bese sibheke yena,” kusho uNkk Mthethwa. Abangani bakamufi uSanele Ngubane no-Africa Mabila, abebefunda nomufi bathe kubamangazile kakhulu ukuthi umuntu ofunda izifundo zamanzi ashonele kuwo.
“Ubekwazi ukubhukuda. Nami wangifundisa ukubhukuda, kwasho ukuthi ngangisaba, ngayeka. Yingakho kumangaza ukuthi uminze kanjani.
“Izifundo zakhe bezigxile kakhulu ekuhloleni izinga lokuhlanzeka kwamanzi. Ubenza ucwaningo khona emadamini aseMidmar. Amanzi ubewazi kakhulu,” kusho uMabila.
Lo mfundi wathweswa iziqu ze-Honours kuyo iHydrology ngoSepthemba ngonyaka odlule.
UNkk Mthethwa uthe bamgqugquzela ekhaya ukuba aqhubeke nezifundo zakhe ngoba enentshisekelo ngazo.
Ezifundweni abezenza kuthiwa ababaningi abamnyama obekwenza afune ukukuguqula lokho.
UPhila ubehlose ukugijima iComrades Marathon okokuqala kulo nyaka njengoba enza kahle kwi-Mandela Marathon ngonyaka odlule.
Abaphathi base-UKZN izolo bavumile kwi-email ukuthi lo mfundi ubeziqeqesha neqembu labagwedli, ngesikhathi sebelanda isikebhe waminza umufi.
Abase-UKZN badlulise amazwi enduduzo emndenini nakubafundi bathi bazomkhumbula ngemisebenzi yakhe umufi.
Okhulumela amaphoyisa uLt Colonel Thulani Zwane uthe amaphoyisa aseHowick avule idokodo ngokushona komfundi. Uphenyo lusaqhubeka.