Usola ukucwaswa ogqenywe ngembazo
USEHLALA ezivalele endlini owesifazane waKwaMakhutha othandana nabobulili obufana nobakhe, othi ugqenywe yindoda yakwamakhelwane ngembazo waphaphama esibhedlela.
UNksz Phumzile Sisi Makhoba (36) othi akakaze axabane nomakhelwane wakhe, uthe wesaba ukuthi angase abuye azomqedela.
Uthe wayehamba nabangani bakhe besilisa bephuma kophuza ngo-Epreli 24 entathakusa, bazithela kumakhelwane wakhe nomngani wakhe emgwaqweni, bamthela ngobhiya ababewuphuza.
“Bangithela ngobhiya ababewuphethe, ngithe uma ngibuza ukuthi bakwenzelani lokhu bathula. Saqhubeka nohambo, sazitshela ukuthi baphuze kakhulu. Akuphelanga sikhathi esingakanani ngezwa engihamba nabo bethi angibhasobhe. Wangishaya ngembazo esiphongweni ngawa. Engangihamba nabo bazama ukulamula kwaqhamuka uyise wafike wavulela ngesibhaxu kulaba ababelamula, babaleka. Ngesikhathi bebaleka wangiphinda futhi. Angikhumbuli ukuthi kwenzekani emuva kwalokhu ngoba ngaphaphama esibhedlela,”
UNksz Makhoba uthe kuze kube manje akazi ukuthi woneni kumakhelwane wakhe ngoba akakhumbuli bexabana.
“Sengikhathele wukushaywa ngabantu abazonda impilo engiyiphilayo babuye baxolise, ngivume ngoba ngingafuni ukuthi sihlalisane kabi. Sekungokwesibili ngihlaselwa ngamadoda angachazi ukuthi ngenzeni, ngemuva kwesigameko kufike abomndeni womhlaseli sixoxe, ngibaxolele.
“Uma ngingavumela isimo esinjengalesi kusho ukuthi ngizogcina nginjani? Ngikhuluma nawe nje nginezitishi ekhanda, angilali yizinhlungu. Mina angihluphi muntu ngiziphilela impilo yami ngokukhululeka. Ngijwayele ukuyongcebeleka nabangani bami. Ngendlela okwenzeka ngayo ngathi lo makhelwane ubesicuthele ngoba azi ukuthi sizodlula ngakubo,” kusho uNksz Makhoba. Okhulumela amaphoyisa kulesi sifundazwe, uLt Col Thulani Zwane, uthe owesifazane ohlala endaweni eyaziwa ngokuthi iseMatshotshombeni, uvule icala lokushaywa ngenhloso yokulimaza.