Udube ibandla exakwe yisitabane
IBALEKE yaduba nebandla inkosazana eBuhleni kwaShembe exakwe wumama ongumkhokheli osolwa ngobutabane okuthiwa ubefuna ukuya nayo ocansini.
Inkosazana (19) okhonza ethempeleni eKushumayeleni, KwaNongoma, elingeke lidalulwe igama layo, ithe isisaba nokuya esontweni ngemuva kokuthi umkhokheli akhonza naye embizele edokodweni lakhe wamtshela ukuthi umile kahle ufuna ukuthi baye ocansini, ngesikhathi besentabeni eKhenani, oZwathini, ngoJanuwari.
Inkosazana ithe umkhokheli wayincoma ngesikhathi begeza, wathi ime kahle futhi nobuntu bayo bukhulu. Wabe esethi ucela amvakashele edokodweni lakhe.
“Yize ngingayithandanga inkulumo kamama u... (esho isibongo sakhe), ngaya edokodweni lakhe ngoba ngiyamhlonipha. Okwangixaka ngedokodo lakhe wukuthi ngaphandle lihlotshiswe ngezimbali ezibomvu. Ngazibuza ukuthi ngabe kungani lize lihlotshiwe kangaka kodwa ngabuye nganganaka. Sengingenile wajabula wanginika izipho –ushokoledi, iyoghurt nomnazaretha omude ofakwe ublomu. Ngathi ngisamangazwe yilezi zipho wabe esesondela kimi engithinta ethi uyangithanda uchazwa nayizwi lami. Ufisa sithandane. Angikwazanga nokuyiphendula le nto ayishoyo ngoba ngimazi engumama ohloniphekile. Ngabona kungcono ngiphume ngibaleke,” kusho inkosazana.
Ithe selokhu yagcina ukuya esontweni ngaleso sikhathi ngoba isaba ukuthi uzohlangana nomkhokheli kodwa akazi ukuthi izombhekelwa ngubani.
Ithe ibikele umkhandlu obhekelele ukuhlukunyezwa kwamaNazaretha, iNazareth Judiciary, ukuze umcebise ukuthi kumele enze njani.
UMnuz Wellington Myeza, ilungu lomkhandlu, uvumile ukuthi udaba lubikiwe kubo wathi nabo bengumkhandlu abakwazanga ukuluxazulula. Bacele izeluleko kwiKhomishini evikela amalungelo eNkolo, uLimi namaSiko.
Uthe bane abesifazane ababike ukuthi bahlukunyezwe ngabesifazane abakholwa wukuthi bayizitabane besohambeni oluyingcwele ngoJanuwari.
UMnuz Thokozani Mncwabe, okhulumela abaseBuhleni, uthe kuyamangaza ukuthi udaba lufinyelele kwabezindaba ngesikhathi esibi kusanda kuphuma isinqumo senkantolo esichitha uNyazilwezulu.“Udaba luthunaza ibandla futhi selunesikhathi lwenzeka. Kungani luputshuka manje. Ngilubona sengathi nalo luyingxenye yokudicilela phansi isithunzi sethu. Ikomiti lebandla yilo okumele luludingide, angiboni ukuthi ukuphumela kwalo kwabezindaba kuzoyisiza ngani inkosazana,” kusho uMncwabe.