Uyashadelwa futhi uMchunu
ZIYAWUSHAYA kuNdunankulu waKwaZulu-Natal, uMnuz Willies Mchunu, ngemuva kokushaya izinkomo zamalobolo kubo kwengoduso yakhe uNksz Zodwa Khoza waseMsinga.
UMchunu (69) kulindeleke ukuba abophe ifindo likasofasilahlane noNksz Khoza, iminyaka yakhe elinganisela kwengu- 30, maduze.
Umthombo weSolezwe osondelene nemindeni yomibili uveze ukuthi uMchunu usezishaye zonke izinkomo, sekusele usuku lomshado.
“Uyashada uMchunu nengoduso yakhe uMaKhoza, indaba yalo mshado ikhulunyelwa phansi kodwa baningi asebeyazi lapha eMachunwini eMsinga,” kusho umthombo.
Ngokuthola kweSolezwe, uMchunu ubesevamisile ukubonakala ehamba noNksz Khoza kweminye imicimbi kahulumeni. Kuvela nokuthi uNksz Khoza uvamisile futhi nokuvakashela uMchunu emzini wakhe oseThekwini.
UMchnu usanda kushonelwa ngunkosikazi wakhe uNkk Dudu Mchunu ngemuva kokugula.
Ukushona kukankosikazi kukaMchunu kwenzeka ngonyaka owodwa u-2016, lapho uNdunankulu alahlekelwa nangabazali bakhe.
Ngemuva kokushona kwamalungu omndeni wakhe, uMchunu uke waxinwa ukugula wangena ephuma ezibhedlela wangakwazi ukuhambela eminye imicimbi kahulumeni.
UMchunu ulanyelwe yiSolezwe esemhlanganweni nabanikazi bamaloli eDube Trade Port, eThekwini, ngoLwesine ebusuku lambuza ngezindaba zokushada kwakhe nalapho engaphikanga futhi engavumanga ukuthi uyashadelwa.
Ebuzwa, uqale wahleka wathi kungani ebuzwa izindaba zakhe eziqondene naye.
“Nami ngiyindoda njengawo wonke amadoda alikho nelincane iphutha uma ngiganwa,” kusho uMchunu ngamafuphi.
Izindaba zokushadelwa kukaMchunu ziphuma ngemuva kokuvela kwezindaba ezithi lowo obengumengameli wakuleli, uMnuz Jacob Zuma, uhlela ukushada nentokazi eneminyaka engu-24, uNksz Nonkanyiso Chonco.
UNksz Chonco oke waba yisishoshovu sezintombi nto uzoba ngunkosikazi kaZuma (76) wesikhombisa.
UZuma kumanje unezingane ezingu-29, njengoba ehlela ukuthatha unkosikazi wesikhombisa, kuvela nokuthi vele sebenengane encane noNksz Chonco.