UZikalala wethule umbiko ngesimo semvelo eKZN
ISENGCUPHENI yokuphenduka ugwadule iKwaZulu-Natal ngenxa yokungavikelwa kwamaxhaphozi nezinye izindawo ezigcina amanzi emvelo.
Lokhu kuvezwe wuNgqongqoshe wezokuThuthukiswa koMnotho, ezokuVakasha neMvelo KwaZulu-Natal, uMnuz Sihle Zikalala, ngesikhathi ethula umbiko wesimo semvelo esifundazweni, izolo, eKZN Sharks Board, eMhlanga.
UZikalala uveze ukuthi iKwaZulu-Natal ithikanyezwa yisivuvujikelele esenza kushise ngokweqile, imvula ine ngamandla futhi kuguguleke isihlabathi emabhishi.
“Isivuvujikelele sihambisana nesiphepho, izikhukhula nesomiso nokunye okunomthelela omubi emnothweni waKwaZulu-Natal. Kusukela ngo-2007 izikhukhula neziphepho zidale umonakalo ka-R250 million emizini yabantu baKwaZulu-Natal. Sinezinhlelo zokufundisa abantu ngesivuvujikelele nokunakelela imvelo,” kusho uZikalala.
Uthe amahlathi adla u-700 000 hectare womhlaba waKwaZulu-Natal futhi asezindaweni ezingamaxhaphozi ezinamanzi emvelo.
UZikalala uveze ukuthi amahlathi nezimboni ezidla u-780 000 wama-hectare omhlaba KwaZuluNatal anciphisa umhlaba wezolimo wabantu nezindawo abazohlala kuzo.
Ngonyaka ngu-109 906 hectare womhlaba olahlekayo ngenxa yesivuvujikelele, ukwakhiwa kwezimboni namahlathi.
Uthe ngo-2003/4 abalimi bakamoba babevuna u-23 million tons kodwa ngo2015/16 bavuna u-15 million tons ngenxa yesomiso.
UZikalala ukucacisile ukuthi akalwi nezimboni nokuthi kungabikhona intuthuko kodwa akufunayo wukuthi kunakekelwe imvelo uma kuthuthukisa izindawo.
Uxwayise osozimboni abalahla udoti ngendlela engahlelekile nasezindaweni ezingafanele ngokuthi bazolala bebaliwe futhi bahlawuliswe nezigidi ngoba uhulumeni uzimisele ukuvikela imvelo nabantu baKwaZulu-Natal.
UMnuz Zama Mathenjwa, onguMqondisi we-Environmental Services eMnyangweni wezokuThuthukiswa koMnotho, ezokuVakasha neMvelo KwaZulu-Natal, uthe bazoqinisekisa ukuthi iKwaZulu-Natal ayiphenduki ugwadule ngokulawula izindawo okufanele kutshalwe kuzo amahlathi nokuvikela amanzi emvelo.
Uphinde waveza nokuthi iTheku yindawo enomoya ongcolile ukudlula ezinye KwaZulu-Natal ngenxa yesiminyaminya sezimoto namaloli.
Izindawo ezinomoya ongcole kakhulu yiRichards Bay, iNingizimu yeTheku bese kuthi ezinye izindawo ezinomoya ongcole ngokungathusi kube wuMgungundlovu, Newcastle nezinye.
Uthe banezinsiza ezihlola ukungcola komoya ezindaweni ezihlukene futhi kunamaphoyisa emvelo azoqinisekisa ukuthi abaphula umthetho bayahlawula.
UMnuz Desmond D’sa, wenhlangano elwela ukuvikelwa kwemvelo eThekwini iSouth Durban Community Environmental Alliance, uthe uhulumeni akayinakekeli imvelo ngoba kuyimanje zifile izinsiza ezibheka ukungcola komoya eThekwini futhi kunyuswe isibalo sabamaloli angena kuleli dolobha saya ku-2 000 ngesonto.
Uthe abantu baseNewcastle badilizelwa imizi ngenxa yokuvulwa kwezimayini ezintsha kodwa uhulumeni akasho lutho.
“Uhulumeni akakhulume nabantu emphakathini abachazele ngezinhlelo zokunakekelwa kwemvelo ngoba kuyimanje kade sisho ukuthi azisebenzi izinsiza ezihlola umoya kodwa akwenziwa lutho. Sifuna ayeke ukukhipha izimvume zezimayini ukuze abantu baphile kahle nemvelo,” kusho uD’sa.