Ingenile imiholo kothisha abangaholanga
SEBEQALILE ukuthola imiholo yabo othisha bakaGrade R ebebengaholanga.
UMnyango wezeMfundo KwaZulu-Natal uthe ingxenye yothisha iqale ukuthola umholo ngoLwesine, usaqhubeka nokukhokhela abanye.
UMnuz Scelo Khuzwayo okhulumela umnyango uthe ngokwazi kwabo inkinga yokungaholelwa kothisha idalwe ngamakhompuyutha, akuyena umuntu othize. Kodwa izinyunyana zithi lokhu kwenziwa ukuthi umnyango ubathatha kancane othisha bakaGradeR. UNksz Nomarashiya Caluza weSadtu uthe izinkinga zokungaholi kothisha zidalwa ukushoda nokungasebenzi ngokuzimisela kwabasebenzi bakwandabazabantu enyangweni
“Siyajabula ngoba inhloko yomnyango isize yakubona ebesikusho yaqoka uNkk Khanyisile Hlongwane ukuthi abe ngumqondisi kulolu phiko. Siyamethemba ngoba sekunesikhathi eside ekhona emnyangweni futhi uke wasebenza nakhona kulolu phiko,” kusho uNksz Caluza. Ephendula ngalokhu uKhuzwayo uthe umnyango uyalusebenza udaba lothisha bakwaGradeR. “Siwumnyango siyabethemba abasebenzi bethu abaqashwe ophikweni lakwandabazabantu. Ngokwazi kwethu kunezinto ezithile kwi-system yethu ezidale ukuthi othisha bangaholi. UNkk Hlongwane uqokelwe ukuba umqondisi walolu phiko okuyingxenye yohlelo lomnyango lokunikeza abaphathi ithuba lokuthi bazazi zonke izingxenye zawo. Akwenziwanga ngoba kunokukhala kwabathize.”
UMnuz Allen Thompson iphini likamengameli weNatu, uthe:“Thina sifuna othisha abasebenze ngesikhathi esisodwa, bahole ngesikhathi esisodwa futhi bahole imali elinganayo. Asinandaba nokuthi umnyango uqasha bani kwandabazabantu. Esikufunayo nje wukuthi othisha bathole umvuzo wabo abawusebenzele ngesikhathi. Uma kwenzeka kuba nothisha abangawutholanga umholo wabo kusasa (namhlanje), sizothatha isinyathelo sesibili. Ukumashela esishayamthetho bekuseyisinyathelo sokuqala.” BHEKA IKHASI 12