Kunconywe igalelo leDBF kwabasathuthuka
UMBUKISO wosomomabhizinisi abasathuthuka eThekwini usuzale inqwaba yosomabhizinisi asebephumelele.
Lokhu kushiwo yiMeya yeTheku uNkk Zandile Gumede kugujwa iminyaka ewu-20 kwasungulwa umbukiso wosomabhizinisi abancane bakuleli dolobha, iDurban Business Fair (DBF) , ngoLwesihlanu.
Uthe iDBF ayigcini ngokukhangisa imisebenzi emihle yosomabhizinisi bakuleli dolobha kodwa ibuye isize osomabhizinisi abasethubeni lokuthi amabhizinisi abo akhule, ngokubeluleka ngokuphathwa kwebhizinisi, ukubahlanganisa nezinye izikhungo ezingaba ngamakhasimende noma ezingaba wusizo emabhizinisini abo.
“Amanye amabhizinisi amancane abekhangisa ngomsebenzi wawo, asekhule aze aba makhulu. Ngenxa yokukhula kwabo size saqala neminye imibukiso emincane ezingxenyeni eziningi zaleli dolobha. Imibukiso emincane yandulela umbukiso omkhulu oba senkabeni yedolobha, njalo ngonyaka,” kusho uNkk Gumede.
Kulo nyaka uthe kusungulwe umbukiso wokuqala waseHammarsdale owaziwa ngokuthi i-Inner and Outer West of Durban, ozoba semasontweni amabili ezayo.
“Imibukiso yamabhizinisi amancane kuleli dolobha iheha nosomabhizinisi bangaphandle kwakuleli abafika kuyo ngenhloso yokuzothenga noma yokuzokwenza ubudlelwane bamabhizinisi nabasuke bekhangise imisebenzi yabo,” kusho uNkk Gumede.
UNksz Xolile Ndlovu weXolile Embroideries, eKwaMashu, uthe ukukhangisa ngomsebenzi wakhe kwiDBF kuholele ekutheni aye emazweni ayodayisa umsebenzi wakhe.
“Sengike ngaya eNew York, eChina naseNew Mexico, e-USA ngiyodayisa umsebenzi wami. Ukuya kulawa mazwe kuyabiza angikwazi ukuzihambela, uma ngithole isimemo sokuthi ngiyodayisa ezimakethe zakhona ngiya kwamasipala, ngifake isicelo sokuxhaswa. Uma ngilapha umasipala uyangisebenzisa ngokuthi ngifundise abanye abantu ubuciko bokuxoxa indaba ngokudweba imidwebo ngisebenzisa i-embroidery,” kusho uNksz Ndlovu.
UNkk Gugu Bhengu wenkampani yobuhlalu, iGugu Mobile Boutique uthe uma uwusomabhizisisi osakhasa kuba nzima ukuzimaketha.
“Ukukhangisa embukisweni onjengalo kukusiza ekutheni uthole amakhasimende, uphinde ubuke ukuthi abanye abantu oncintisana nabo balenza kanjani ibhizinisi, bese uyakhula,” kusho uNkk Bhengu.