Iphoyisa eliwola iziqu zemfundo seliyisibonelo
LIFUNA ukubheka amathuba kuyo yonke imikhakha iphoyisa elisanda kuthweswa iziqu zomthetho, elinolunye uxhaxha lweziqu.
UWarrant Officer Mandla Mnyandu (56) waseSiphingo osebenza esiteshini samaphoyisa eBrighton Beach eThekwini, uthweswe iziqu zePost Graduate Diploma in Law e-University of KwaZulu-Natal.
UMnyandu (osesithombeni) oneminyaka engu-28 eyiphoyisa, uthe wangena emsebenzini engenawo u-matric, wazimisela ngokufunda. Ezinye iziqu anazo kubalwa iDiploma neDegree in Policing, iHuman Resources Management Diploma, isitifiketi seProject Management neseTourism. Kumanje wenza i-Advanced Course in Criminology.
“Angiqedile ukufunda ngoba ngifuna ukulandela ngeHonours kwiCriminology. Emaphoyiseni miningi kakhulu imikhakha engingangena kuyo yingakho ngibamba kwasani ukuzandisela amathuba. Ukufunda kwenza ukwazi ukuzimela, ukwazi nokumelana nazo zonke izinselelo emsebenzini nasempilweni jikelele. Angifuni ukuthi uma kuvela ithuba emsebenzini kutholakale ukuthi anginazo iziqu kulowo mkhakha,” kuchaza uMnyandu.
Mayelana nezifundo zeCriminology azenza manje, uthe zingamvulela amathuba nasemnyangweni wezokuhlunyeleliswa kwezimilo. Uthe angakwazi nokuzimela uma eseneHonours kulo mkhakha. “Kunezinto okumele uzigweme uma ufunda ukuze ungaphazamiseki. Kungisizile nokuba nomndeni nabaqashi abangesekayo ngoba lokho kunginika ugqozi,” kusho uMnyandu.
Uthando lokufunda uthe uselufake nasemndenini wakhe, bonke bazimisele ukufunda njengaye. Nasebandleni lakhe i-The Old Apostolic Church SA anguMbhishobhi, usethelele nabanye ngokufunda. UMnyandu usenendathane yezindondo nasemsebenzini. Ngo-1999 waklonyeliswa ngeLoyal Service Award yokusebenza iminyaka elishumi. Ngo-2001 wathola i-Amalgamation Medal, ngo-2005 wathola iCommemoration Medal, ngo-2009 wathola Loyal Service Medal yeminyaka engu-20 esebenza. Ngo-2012 wathola iSoccer World Cup Support Medal esethimbeni ebelibhekele indebe yomhlaba ka-2010. Ngo-2013 wathola iCentenary Medal.