Kusahamba kahle ngezinguquko kuKhozi
UMPHATHI woKhozi FM obambile, uSbongi Ngcobo, uthe weneme ngendlela izinto ezihamba ngayo kulo msakazo ngemuva kokwenziwa kwezinguquko eziqale ukuzwakala emoyeni ngo-Ephreli 1.
Izinguquko ezenziwe yilo msakazo zihlanganisa ezokususwa kukaNongcebo McKenzie ezinhlelweni zakhe iSithakela Isizwe neZingasoze Zabuna zathathwa nguBheka Mchunu noNkosinathi Mshengu ngokwahlukana.
UNongcebo ufakwe ohlelweni lwasekuseni phakathi nesonto iVuka Mzansi Breakfast Show noDJ Sgqemeza.
UZimiphi “Zimdollar” Biyela ubuyiselwe ohlelweni iSigiya Ngengoma wafakwa noNonhlanhla “Mdonso” Ngcobo olandwe kwiZululand FM.
Kuphinde kwaqashwa abantu abasha okungu-Ayanda Melansi odidiyela iWoza Nabangani Bakho, nabasakazi uThokozani “MaFresh” Mpungose, Lindani “Lee” Hlophe noZandile “Zeal” Dladla.
“Ngijabule ngendlela wonke umuntu azinza ngayo kulezi zinguquko ezintsha,” kusho uSbongi.
Ngalezi zinguquko lo msakazo unethemba lokuthi isibalo sabalaleli sizokhula sisuke ku-7 274 000 isibalo sifinyelele ku-7 500 000.
NgoMgqibelo leli phephandaba lizame ukukhuluma noNongcebo ukuzwa ukuthi kunjani ukusebenza ohlelweni lwasekuseni njengoba ayesenze Ezingasoze Zabuna iminyaka.
Uvele wakokozela intatheli wadla phansi wayoqhubeka nemisebenzi abeyenza.
UbeseMoses Mabhida Stadium lapho kade enze khona umcimbi iSports Health Fitness Exchange (SHF).
Ekhuluma ngaphambi kokubaleka uthe inhloso yomcimbi, obekungowesithupha kulo nyaka, ukugqugquzela abantu ukuthi baphile ngokunakekela imizimba yabo.
Bekudlalwa imidlalo eyahlukene okubalwa kuyo ibhola, elombhoxo neminye futhi kuhlolwa nezifo.