Lishaye eceleni kweKZN izembe
ALIKHO iqembu laKwaZuluNatal eligawulwe yizembe kwiNational First Division (NFD) esongwe izolo ntambama.
UThongathi FC neRichards Bay FC bebelengela ezembeni ngaphambi kwemidlalo yayizolo kodwa bazisiza ngokuwina imidlalo yabo yokugcina.
La maqembu abebanga neSuper Eagles no-Ubuntu Cape Town. UMthatha Bucks vele kade wagawulwa yizembe.
Bese kudingeka iqembu elilodwa elizohamba noMthatha. Ngaleso sikhathi bekuminciwe eKZN.
UThongathi luguqise i-University of Pretoria ngo 1-0 kwathi iRichards Bay yabuya namaphuzu amathathu kwiMbombela United Kabokweni Stadium, eMpumalanga.
ISuper Eagles yiyona edliwe yizembe ngemuva kokubambana noMthatha Bucks ngo 1-1 eGoble Park.
Ubuntu Cape Town buguqise iTshakhuma ngo 3-1 ekhaya okwenze balingana neSuper Eagles ngamaphuzu angu-32.
Ubuntu buvike izembe ngenxa yomehluko wamagoli ongcono kunoweSuper Eagles.
Kuphelile ngephupho leReal Kings lokuyodlala emidlalweni yokuhlunga.
IKings ithelwe othulini yiCape Town All Stars ngo 2-1 emdlalweni weNFD eKing Zwelithini Stadium, eMlaza izolo ntambama.
Amagoli e-All Stars abaselwe enethini nguTsepo Mashigo noSello Letoane kwathi eleKings labhanjiswa ezintanjeni nguLindokuhle Bhengu.
IKings ibidinga amaphuzu amathathu bese ihlalela ethembeni lokuthi iJomo Cosmos iguqise iBlack Leopards eThohoyandou Stadium. ILeopards ibhabhadise iCosmos ngo 3-0 kulo mdlalo.
ICosmos neLeopards yiwona amaqembu aya emidlalweni yokuhlunga neqembu elizoqeda endaweni ka-15 kwi-log ye-Absa Premiership.
Akwaziwa ukuthi iCosmos izoyithini iLeopards kule midlalo njengoba izolo ibizenzela umathanda.
Icishe yawina ngembudlu yamagoli.
IHighlands Park yiyona engompetha beNFD.
Izolo inikwe indebe ngokusemthethweni ngemuva kokushaya iStellenbosch FC ngo 3-0 eKapa.