Uvalo kumaskanda ovelelwa yizingozi
USESHAYWA wuvalo umculi kamaskandi, uMthandeni “Igcokama Elisha” Manqele ngokuvelelwa yizingozi zezimoto uma kuqala unyaka.
Ngonyaka owedlule lo mculi wavuka esibhedlela ngemuva kwengozi eyenzeka ngaseVryheid eshayela iToyota Quantum yakhe ehamba namagidangoma bephuma emcimbini.
Muva nje wehlelwe enye ingozi lapho eshayise isilwane okusolakala ukuthi yisambane emgwaqweni u-N3 esuka eGoli.
“Le nto ngiyishayise ku-tollgate wokuqala uma usuka eGoli. Abayaziyo bathi yisambane. Ngabe kuyezwakala ukube kuthiwa ngiyishayise ezintabeni kodwa hhayi kuthelawayeka. Ukushayisa isilwane esinje kwenza kube bucayi ngoba uma sikubhekile uba nebhadi futhi sakha imithi enzima,” kusho Igcokama.
Libuzwa ukuthi kukhona yini elikusolayo lithe: “Kunzima ukuthi ngingasho ngoba okubalulekile ukuvikela amagama. Kungasuka impi enkulu uma ngingaveza amagama. Okubalulekile ukuthi umuntu anqobe ngoba ukushayiseka kwaso sife kusho ukunqoba.”
IGcokama lithe kudala zilinetha lisinda. “Namanje ngisaphunyuka, uThixo uhlezi enami.”
Libe selinxusa umdali ukuthi alivikele njalo. Ukhale ngokuthi nangesikhathi sengozi yeQuantum wabona inyoka emgwaqeni, umqondo wahamba.
“Ingcono ingozi obonayo ukuthi ushayise imbuzi noma inkomo kodwa hhayi ukuthi ushayise inyathi eMhlanga. Ngabe ivelaphi?”
Igcokama lithe belisaba ukukhuluma ngale ngozi ngoba izindaba ezimbi bezizothusa abalandeli balo.