Ukhuza ibuya uJerry Maake kwiThe Queen
USHAYA ibuya emdlalweni iThe Queen kuleli sonto umlingisi owaziwa ngoJerry Maake (Shona Ferguson), obesenyamalale kulo mdlalo. Uzofika emdlalweni nendodakazi yakhe u-Amogelang (Natasha Thahane), owagcina ukubonakala kuwo nyakenye.
Isolezwe lixoxe nokhulumela uMzansi Magic, uBongiwe PotelwaMetsig, oveze ukuthi ukushona kukaBakang (Thato Molamo) yikho okuzoholela ekutheni laba babuye.
“Njengoba wonke umuntu ebonile uBakang ushonile futhi akukho okuzoshintsha lokho. Kodwa igama lakhe lisazolokhu liqhubeka nokuvela kulo mdlalo,” kuchaza uBongiwe.
Uthe uJerry no-Amogelang bazofika bengabantu abadumele ngokuzwa izindaba zokudlula emhlabeni kukaBakang.
“Ngeke size sikwazi nokuthi siyabonga ngokuba yingxenye yomdlalo kukaBakang njengoba kukuningi okusazokwenzeka kulandela igama lakhe,” kuchaza uBongiwe.
Uthe ngisho ezinkundleni zokuxhumana abantu bebengathekisa ukuthi lo mlingisi usazovuka kodwa ngeke kwenzeke lokho.
“Kweminye imidlalo sibonile abantu bevuka ekufeni kodwa kulo, cha ngeke kwenzeke lokho,” kusho uBongiwe.
Ucacise ngodaba lukaMoshe Ndiki naye ovalelisile emndenini waKwaKhoza. Kodwa lo mlingisa olingisa indawo kaPrince wathi akayi ndawo okwamanje, usazobonakala eziqeshini ezahlukene.
Kulo mdlalo kubuya laba balingisi nje kuseza obunye ubuso obusha kuwo njengoba kuzobonakala u-Aaroni Moloisi elingisa indawo kaMadimetja noPaballo Moganedi ozobe elingisa ekaMamiki.
URobert Mpisi usekhona kuwo, ulingisa indawo kaBheki oyindodana kaBrutus.