UDhlomo akakwesabi ukuvela kwikhomishini
UNGQONGQOSHE woMnyango wezeMpilo KwaZulu-Natal uDkt Sibongiseni Dhlomo uthi akanalo noluncane uvalo njengoba ezovela phambi kweKhomishana yamalungelo abantu ngoMsombuluko eyochaza ngodaba lwemishini yokuhlola osuke usesigabeni esixakile somdlavuza.
Ekhuluma nabezindaba ngemuva kokwethula isabelomali somnyango wakhe sikaR43 billion esiShayamthetho saKwaZuluNatal, eMgungundlovu, izolo, uDhlomo uthe benza konke okusemandleni abo ukuzama ukuxazulula izinkinga zokushoda kwemishini elapha umdlavuza.
Uthe ikhona imishini asebeyithengile ngenhloso yokuzama ukulungisa isimo.
UDhlomo, ngoMsombuluko kulindeleke ukuba avele phambi kweKhomishini yamaLungelo aBantu mayelana nalolu daba lapho kulindeleke ukuba ayonikeza izimpendulo.
Okhulumela i-DA esiShayamthetho saKwaZuluNatal ezindabeni ezithinta ezempilo, uDkt Imran Keeka, uthe izinkinga ezikhona eMnyangweni wezeMpilo KwaZulu-Natal ngeke ziphele uma kusekhona uDhlomo.
Uthe kusukela kukhona uDhlomo kulo mnyango izinkinga ziqhubekela phambili kunokuthi zinciphe.
“Sekuhambe izinhloko eziningi zalo mnyango nezinye izikhulu kodwa uDhlomo uhleli akayi ndawo,” kusho uKeeka.
Uthe ngeke baze baphumule uma uDhlomo engakaxoshwa.UKeeka uthe lesi sabelo mali esethulwe nguDhlomo ngeke size sizifeze zonke lezi zithembiso azenzayo.
“Ungqongqoshe uyazikhulumela nje ukhohlisa umphakathi ngale nto ayishoyo naye futhi uyazi ngeke zenzeke lezi zinto azishoyo, into nje efanele ukuthi esule emsebenzini,” kusho uKeeka.
UNkk Ncamisile Nkwanyana, okhulumela i-IFP ezindabeni zezempilo esiShayamthetho, uthe bona bayasamukela isabelomali esethulwe nguDhlomo.
Uthe izinhlelo ezethulwe nguDhlomo zibuyisa ithemba emkhankasweni wokulwa nezifo. UMnuz Vukani Ndlovu we-EFF uthe bayakholwa ukuthi isabelomali somnyango singakwazi ukulekelela uma sizosetshenziswa ngendlela. Uthe bayafisa futhi ukuthi kuthengwe yonke imishini ebalulekile engasiza ekulweni nezifo. UMnuz Sifiso Sonjica we-ANC uthe bayasamukela lesi sabelomali wathi abangabazi ukuthi sizosiza kakhulu ekulweni nezifo. Iklanywe kanje imali yomnyango Imali yokubhekelela ukusebenza R811 207 Eyokubhekelela ukuhlinzeka izifunda R20 825 714 Eyezimo eziphuthumayo R1 415 686 Eyezidingo zezibhedlela R11 232 418