Kukhalwa ngesivinini ngedlule nabafundi
KUKHALWA ngesivinini esiphezulu obekuhamba ngaso umshayeli weveni oshayisane nesithuthuthu kwashona abafundi ababili eNkwali ngaseMgababa.
UMlungisi noThabiso Maphumulo abebefunda eRoberts Hlongwa High bashone engozini yesithuthuthu ngakubo ngoLwesibili ntambama.
Laba bozalo olulodwa kwaMaphumulo kuthiwa bebengahlukani, bejwayele nokuhlangabezana ngaso isithuthuthu. Uhambe ngesithuthuthu ukuyolanda okuthize kwamakhelwane. Sikhala kakhulu ngesivinini esiphezulu esizwe ukuthi umshayeli weveni ubehamba ngaso endaweni eyijika kanti uzozithela phezu kwabo. Okunye okusikhalisayo silinde kakhulu i-ambulensi ukuba ifike. Baze bashonela ezandleni zethu ngoba bebelimele kakhulu. Kube nzima kakhulu ngoba abantu bandawonye futhi besisabheke lukhulu kubona,” kusho uNksz Maphumulo.
UThabiso obefunda uGrade 11 kuthiwa ubephuma esikole esabelethe isikhwama sezincwadi, efake nomfaniswano.
Laba bafundi kuthiwa bebengazifakile izigqoko zokubavikela ekulimaleni uma uhamba ngesithuthuthu njengoba bezisele kubo kaMlungisi. UMlungisi kade efunda uGrade 9. Amalungu omphakathi abevakashela le mindeni njengoba isemanzini abekhala ngokuhamba ngesivinini esiphezulu kwezimoto emwaqweni okwenzeke kuwona ingozi ekubeni unamajika.
Kubo kaThabiso, uyise ubengekho. Kucelwe ukuba afonelwe ukuze akhulume nezintatheli ngalolu daba. Akazange atholakale ocingweni lakhe. Umndeni wakhona uthe nawo ushaqekile ngalesi sigameko esibazumile.
Amaphoyisa aseManzimtoti avule icala ngalengozi, uphenyo lusaqhubeka.