Uyaqonga umsindo ngoManana wesibhaxu
USOMLOMO wePhalamende, uNksz Baleka Mbete uthe ukhathazekile ngezinsolo zodlame ezithinta ilungu lePhalamende elisesigungwini esiphezulu se-ANC, uMnuz Mduduzi Manana.
Uthe amalungu ePhalamende kufanele ahloniphe umthetho, angahlukumezi abantu, ukuze abe yisibonelo esihle emphakathini.
“IPhalamende lizophenya ngalezi zinsolo bese lenza iziphakamiso ngezinyathelo okufanele zilandelwe. Amalungu ePhalamende sifuna aziphathe kahle ngaso sonke isikhathi, ngisho engekho ePhalamende kufanele aziphathe kahle,” kusho uNksz Mbete.
Izolo, i-ANC Youth League, Democratic Alliance, Young Communist League (YCL), Cosatu neSonke Gender Justice baphakamise ukuthi ehle esikhundleni uManana.
UNgqongqoshe wezabeSifazane eHhovisi likaMengameli, uNksz Bathabile Dlamini uthe uManana umsulwa kuze kube ulahlwa yicala enkantolo.
“Siyalwamukela uphenyo olwenziwa wuphiko lwezokushushisa kulolu daba. Siyathemba uphenyo luzophothulwa ngokushesha yize umsebenzi kaManana elisulile icala,” kusho uNksz Dlamini esitatimendeni.
Uthe akahambisani nokuhlukunyezwa kwabesifazane futhi uManana kufanele aphile impilo ngokulandela uMthethosisekelo.
Ngempelasonto kuvele ukuthi uManana uphushe umsizi wakhe wasendlini, uNkk Christine Wiro (53) wawa ezitebhisini emzini wakhe oseGoli.
UNkk Wiro wavula icala emaphoyiseni kodwa waphinde walisula.
Kunezinsolo ezithi usule icala emuva kokuthenjiswa uR100 000 nguManana. Kodwa uManana uziphikile lezo zinsolo wasabisa ngokuthatha izinyathelo zomthetho.
NgoLwesibili kuvumbuke inkulumo eqoshiwe lapho kuzwakala uManana ethi uzohlawula uR100 000 ngalokho uNkk Wiro akubona kuwukumhlambalaza noma ukumhlukumeza.
Nyakenye, uManana ubhekane necala lokushaya abesifazane endaweni yobumnandi iCubana, walengiselwa isigwebo seminyaka emihlanu. Wayalelwa ukuthi akahlawule uR100 000, asize umphakathi amahora angu-500 futhi angatholakali esephutheni elifanayo kungakapheli izinyanga eziwu-12. Izolo i-ANCYL ithe uManana akayihloniphi imithetho yaseNingizimu Afrika, eye-ANC nabantu ngakhona, kufanele aboshwe.
UMnuz Sizwe Pamla okhulumela iCosatu kuzwelonke uthe, i-ANC kufanele ixoshe uManana ePhalamende nasekomitini elibhekele ukusebenza kwenhlangano ngoba kuyacaca ukuthi akazimisele ukulandela umthetho.
UMnuz Bafana Khumalo weSonke Gender Justice, uthe nabo bafuna uManana ajeze ngoba ngeke umuntu avule icala bese elisulwa kungekho asatshiswe ngakho.
UMnuz Molaodi Wa Sekake okhulumela iYoung Communist League, uthe siyabanyanyisa isenzo sikaManana futhi abazi kungani engaboshiwe.
“Sifuna aboshwe uManana ngoba sekukhona nenkulumo eqoshiwe ekhombisa ngokusobala ukuthi umama (uNkk Wiro) usule icala ngoba ethenjiswa imali futhi esatshiswa ngokuthi uzobuyiselwa eZimbabwe. Akwamukelekile ukuhlukunyezwa kwabesifazane, kuyanyisa. Abenza lo mkhuba kufanele baboshwe ukuze nabanye bafunde ukuyeka lo mkhuba omubi,” kusho uWa Sekake.
IDA ithe izovulela uManana icala ophikweni olubhekele isimilo samalungu ePhalamende.
UDkt Lubna Nadvi onguSihlalo we-Advice Desk for the Abused, uthe uManana kwakufanele asuswe esikhundleni emuva kokuvuma ukuthi ushaye abesifazane abathathu ngonyaka odlule.