Uyagoloza ukuphuma ehhovisi lobumeya uDe Lille
UQHUBEKILE nomsebenzi wakhe wobumeya uNkk Patricia De Lille njengoba ebekhuluma emcimbini wesidlo sasekuseni obuhlelwe yiCape Times, yize iDA ihoxise ubulungu bakhe ngoLwesibili.
UNkk De Lille uphucwe ubulungu beDA ngoba kuthiwa wazisholo ukuthi uzosula eqenjini uma esewine icala alifake enkantolo.
Izolo uNkk De Lille uthe ufuna kube yinkantolo ethatha isinqumo ngezinsolo azibekwe yiDA nangesinqumo sayo sokumxosha ngokungemthetho.
“I-DA ihoxise ubulungu bami njengeqembu lepolitiki okusho ukuthi ngisazoqhubeka nokuba yimeya yaseCape Town kuze kube inhlangano yokhetho yaziswa ukuthi kunesikhala somsebenzi wami. Okwamanje angikakatshelwa ukuthi angiseyona imeya ngoba ngiye enkantolo. Sengithembe umthetho ukuthi uxazulule le nkinga,” kusho uNkk De Lille.
Utshele abantu ukuthi inkinga yaqala ngesikhathi ethula uhlelo lokushintsha ukwakhiwa kwezindlu ukuze abantu bahlale beyizinhlanga ngokwahlukana.
“Kuneziqephu zomhlaba ezingu-11 eSalt River, Woodstock, nasenkabeni yeCape Town esifuna ukuthi kwakhiwe kuzo izindlu. Sinohlelo lokuqeqesha abantu abangaphezu kuka-100 esibahlomisa ngamakhono okwakha, awokuba wo-plumber nokunye. Inhloso wukuthi basebenze ezinhlelweni zokwakhiwa kwezindlu ezizohlalisa bonke abantu baseCape Town,” kusho uNkk De Lille.
Uthe ubudlelwano bakhe neDA bumosheke ngo-2014 ngesikhathi ethula izinhlelo zoguquko kuMasipala waseCape Town.
UNkk De Lille uthe uMnuz Dirk Smit umthumelele incwadi ebimtshela ukuthi akufanele asebenzise izimoto zikamasipala nezinye izinsiza zawo ukuhambela imicimbi ngoba utshelwe ukuthi makaphume ehhovisi lakhe ngoMeyi 10 (namhlanje).
USmit uqhube wathi uNkk De Lille kufanele ahambe ehhovisi futhi abuyise okhiye bakamasipala nayo yonke impahla kamasipala engakuye.
Ekhuluma ne-Independent Media, uSmit uthe:“Utsheliwe ukuthi akaphume ehhovisi kodwa akakwenzanga lokho, yonke impahla yakhe okuhlanganisa nefenisha isekhona. Kubambe uMnuz Ian Neilson esikhundleni semeya.”