Indondo yokwenza kahle esiteshini iHighflats
UKUSHINTSHA indlela yokusebenza kuholele ekutheni isiteshi samaphoyisa ebesihamba phambili ngokuba nobugebengu sibe ngesihamba phambili ngokwehlisa ubugebengu.
Isiteshi samaphoyisa saseHighflats sithole indondo yokuba yisiteshi esenyuse kakhulu amasokisi, ngesikhathi kunomcimbi wokuchonywa uphaphe iziteshi ezenze umsebenzi oncomekayo iHarry Gwala Cluster, izolo.
Lesi siteshi sichonywe, uBrigadier Thobekile Shezi ongumphathi weCluster.
Isiteshi saseHighflats sihambe phambili ngokwehlisa ubugebengu, silandelwa iDonnybrooke, kugcine iGaulee.
UCol Zandile Nguse ongumphathi wesiteshi saseHighflats, uthe ujabule kakhulu ukuthi lesi siteshi sesihamba phambili ngokwehlisa ubugebengu.
“Ngingene kulesi siteshi kunezinkinga abasebenzi bengakwazi ukusebenzisana, kuyilowo nalowo ebheke umsebenzi wakhe. Ngezinye izinsuku bekuba khona abadubayo.”
Uthe amacala amaningi abenyusa izibalo zobugebengu kulesi siteshi awokwebiwa kwemfuyo, awokubulala, nawezimoto ezintshontshiwe obekunesidleke ebezifihlwa kuso. “Ukusebenzisana phakathi kwamaphoyisa, abalimi nonogada abagada emapulazini kushintshe izinto kwaboshwa amasela. Isidleke okufihlwa kuso izimoto ezebiwe sisihlakazile, kodwa kusamele siqhubeke nokusebenza kanzima ngoba ubugebengu busekhona futhi isikhathi esiphila kuso sidinga ukuthi sihlale siqhamuka namasu amasha okulwa ngobugebengu.”