Sekuzofundwa ngomlando waseNingizimu Afrika ezikoleni
KUZOSHINTSHA ukufundiswa kweHistory ezikoleni zakuleli njengoba kuzofundwa ngomlando wakuleli.
Lokhu kuvezwe nguNgqongqoshe wemfundo eyisiSekelo kuleli uNkk Angie Motshekga ekhuluma nabezindaba ngaphambi kokuthula isabelo sezimali ePhalamende eKapa izolo.
Izinyunyana zothisha nezinye izinhlangano zezepolitki bezihlale zihlaba ikhwelo lokuthi kufundwe ngomlando wakuleli nokuthi iHistory kumele ibe yimpoqo kubafundi bakuleli.
UNkk Motshekga uthe inhloso yokuguqula ukufundiswa kweHistory kuzokwenzeka eminyakeni eyisikhombisa ezayo.
“Uhlelo lokufunda kumele luhambisane nesikhathi. Uhulumeni ufuna ukwenza izinguquko ezinqala kwezomnotho ngakho uhlelo lokufundisa kumele luhambisane nalokho.”
Uthe ithimba elajutshwa ukuthi lubheke ukuthi iHistory ibe yimpoqo kubafundi lizodedela umbiko walo ngalokhu nge-Afrika Day (May 25).
“Izinhlaka ezehlukene zizobizwa zizokwenza izethulo njengoba kuzoba nezigcawu zomphakathi njengoba sizobe sifuna ukuthola ukuthi kumele uhlelo lokufundisa kabusha iHistory lubukeke kanjani. Sizofundisa abafundi ngomlando wakuleli, e-Afrika.” Uthe akukwazi ukuthi kungafundwa kuphela ngomlando wezinguquko ezenzeka eFrance wathi noma kumele bafundiswe ngalokhu kodwa kumele bazi futhi ngokwenzeka eHaiti.
Okhulumela iSadtu, uNksz Nomusa Cembi, uthe bayabonga ukuthi sekuyenzeka ekugcineni. “Kudala ekhuluma ngayo, asethembe ukuthi kulokhu kuzokwenzeka. Siwulindile umbiko ukuze sazi ukuthi uquketheni, sifuna ibe yimpoqo iHistory ezikoleni zethu. Uthe izwe elingawufundisi umlando kubafundi aliyi phambili, yingakho babehlaba ikhwelo lokuthi lesi sifundo kumele sibe yimpoqo kuwona wonke umfundi ukuze bazazi ukuthi baphumaphi.