Bakhala ngempatho engeyinhle abengqephu
BAKHALA ngempatho engeyinhle abasiki bengqephu baseThekwini abaveze ukuthi bakhacwa yizikhulu zenkampani ehlela iDurban Fashion Fair (DFF) zibabize ngezidomu namanye amagama ayiziswana.
Laba basiki bengqephu baphinde baveza ukuthi yize iDFF kuwumbukiso wengqephu waseThekwini kodwa uhlelwa yinkampani yaseCape Town efika nabantu bayo ingabanikezi amathuba omnotho abantu baleli dolobha.
Abasiki bengqephu batshele Isolezwe ukuthi uma bekhala ngempatho engeyinhle ezikhulwini zeDFF bavele basatshiswe ngokuthi ngeke baphinde bamenywe bazosala “ezintweni”.
“Kudala sikhala kubaphathi beDFF kodwa basisabise ngokuthi ngeke sisamenywa. Abanye ozakwethu abasakhangisi ngenxa yokuzwakalisa izikhalo zabo. Ngonyaka odlule kuqokwe inkampani yaseCape Town ukuthi ihlele iDFF, siyafa wukuthukwa ngoba abanikazi bayo basibiza ngezidomu. Siphathiswa okwezilwane kodwa abasiki bengqephu abavela kwezinye izifundazwe baphathiswa okwamaqanda,” kusho omunye umsiki.
Uveze ukuthi into eyenza abasiki bengqephu baseThekwini bahambe kuleli dolobha wukungahlonishwa nokuphathwa kabi.
“Sihlonishwa eGoli kwiSA Fashion Week ngenxa yethalente lethu elithathwa kancane eThekwini. Asazi ukuthi kuhlomula bani ngokuqokwa kwenkampani yaseCape Town zibe zikhona izinkampani ezihlela imicimbi esezingeni eThekwini. Abantu baseThekwini abahlomuli ngokwanele kwiDFF ngoba awekho amakhono abawatholayo. Baqashwa ukuthi baqoqe amathikithi nokuthi bamukele abantu,” umsiki wengqephu.
UMnuz Mandla Nsele oyiPhini leNhloko yoPhiko lwezokuXhumana kuMasipala weTheku, uthe iDFF yindawo yawo wonke umuntu osemkhakheni wengqephu kungakhathaleki ukuthi uwuhlobo luni.
Uthe maningi amabhizinisi abantu abamnyama asebenza kwiDFF futhi kunemibandela ethile edingeka enkampanini esuke izophatha umsebenzi weDFF.
Uveze ukuthi eminyakeni emithathu edlule bekusebenza inkampani ebiyilandela yonke imibandela nezidingo ezibekiwe.
Uthe abasiki bengqephu bayamenywa ukuthi bazokhangisa ngokuthi kufakwe izikhangiso ephephandabeni likamasipala Ezasegagasini, ezinkundleni zokuxhumana nakwiwebsite yomkhandlu.
Uthe akusilo iqiniso ukuthi iDFF iphethwe ngabantu bolunye uhlanga baseCape Town ngoba eminyakeni edlule ibiphethwe yinkampani yomuntu omnyama.
“Inkampani yaseCape Town iqokwe ngonyaka odlule futhi bekuyiyona kuphela inkampani efake isicelo somsebenzi ebinakho konke obekudingakala. Asikwazi ukudalula inkampani eqokiwe ngoba kusalungiswa izinhlelo zokusebenza kwayo.”
Uthe kuyaphoxa ukuthi kunabantu abathi iDFF ayibahlomulisi ngalutho abasiki bengqephu nabantu baseThekwini ngoba lokho akusilo iqiniso.
“Umasipala wenza uhlelo lweDFF ukuqinisekisa ukuthi abasiki bengqephu bathuthukisa amakhono abo bathole namathuba okukhangisa umsebenzi wabo. Bayiswe koMilan namanye amazwe. Kuphinde kuvumbululwe amakhono abakhangisi bengqephu. Abasiki bengqephu sibasizile ngokubavulela amathuba ezimakethe eThekwini nangaphandle kwesifundazwe. Abasiki bengqephu kufanele basebenze ngokuzikhandla ngoba sisuke sesibahlomise ngawo wonke amakhono abawadingayo ukuze baphumelele,” kusho uNsele.