Owe-ANC ulale ebaliwe ngecala lokushaya

LILALE libaliwe ikhansela le-ANC eNelson Mandela Bay, u- Andile Lungiswa ogwetshwe iminyaka emibili ebhadla ejele kwalengiswa owodwa.

ULungisa ubehlela ukusidlulisa isigwebo senkantolo kodwa akazange aphumelele njengoba inkantolo isichithile isicelo sakhe.

Ngo-2016, uLungisa washaya ilungu lesigungu sakwamasipala, uMnuz Rano Kayser ngojeke wengilazi emhlanganweni wesigungu sikaMasipala waseNelson Mandela Bay. UKayser wasala emabokoboko ekhanda nasemqaleni kanti nezithombe zakhe zagcwala ezinkundleni zokuxhumana njengoba elinye lamalungu alalikhona lasiqopha lesi sigameko.

I-video eyaqoshwa yikhansela uMnuz Renaldo Gouws leDA, likhombisa uLungisa egqema uKayser ekhanda, ibiyingxenye yobufakazi obethuliwe enkantolo.

Ngesikhathi igweba uLungisa, iMantshi uMnuz Morne Cannon, ithe ikuqaphelile ukuthi lesi sigameko sashiya uKayser elimele kanzima futhi sabeka impilo yakhe engcupheni.

UKayser uveze ukuthi ngemuva kwalesi sigameko ube nenkinga yokukhohlwa izinto kalula.

“Namanje usasho ukuthi uphathwa yikhanda elinzima aphinde akhohlwe izinto kalula, noma sekuphele iminyaka emibili senzeka isigameko. Ngisho udokotela uthe kuyinhlanhla ukuthi usaphila,” kusho uCannon.

Ngemuva kwesigwebo uLungisa uthe uyasamukela futhi ayisihlonipha isinqumo senkantolo.

Okhulumela iDA e-Eastern Cape, uMnuz Mlindi Nhanha, uthe iqembu lijabule ngesinqumo senkantolo.

“Silahlekelwe ngomunye wosopolitiki abaqavile e-Eastern Cape, okuyinto edabukisayo. Kodwa ke imantshi namhlanje ithumele umyalezo wokuthi umthetho usebenza kubo bonke abantu. Siyethemba lo myalezo uzofinyelela kumalungu e-ANC eNelson Mandela Bay, ubugebengu abunandawo emphakathini,” usho kanje.