Ayipheli inkinga kagesi e-Adams

BATHI abasazi bazokhala kubani abantu baseNkanyisweni, e-Adams Mission abakhala ngokuthi alipheli isonto bengacinyelwanga ugesi futhi ukukhala kuMasipala weTheku akuwenzi umehluko ngoba lesi simo siyaqhubeka.

Batshele Isolezwe ukuthi ugesi uphela ngabo-5.30 ekuseni uze ubuye ngabo-11 ekuseni, uphinde uphele ngabo7 ebusuku uze ubuye ngabo-3 ezintatha.

UMnuz Wonderboy Mkhize utshele Isolezwe ukuthi kudala bezama ukuthinta izikhulu zakwagesi kuMasipala weTheku kodwa ayilungiswa inkinga yabo yingakho sebekhala kwiSolezwe.

Uphinde waveza ukuthi akusiwo ugesi kuphela obahluphayo kodwa kukhona nenkinga yokuphela kwamanzi abawathuthelwa amaloli ngenxa yokuthi sekunesikhathi engaphumi kompompi.

UMnuz Mandla Nsele oyiphini lenhloko yezokuxhumana kuMasipala weTheku, uthe bayalwazi udaba lwezinkinga zamanzi nogesi e-Adams Mission okudalwa wukwebiwa kwamakhebuli futhi bazozilungisa.

“UMasipala weTheku unezisombululo ozisebenzisayo ukuxazulula inkinga yamanzi nekagesi e-Adams Mission. Amanzi abo avela esikhungweni samanzi i-Adams K5 Reservoir esisemgwaqweni uSheleni. Amanzi angena kusona siwathatha kwi-pump station ebizwa ngeAdams K4 kodwa abe nezingqinamba ngenxa yokwebiwa kwamakhebuli endaweni. Njengamanje sithatha amanzi aseAdams K6,” kusho uNsele.

Uthe uma ugesi ungekho, amanzi awabi khona ezikhungweni ngoba amaphampu asebenza ngogesi kanti kuthatha amahora angu-18 ukugcwalisa isikhungo uma sesiphelelwe amanzi.

Ugqugquzele umphakathi ukuthi ubike ukwebiwa kwamakhebuli nezigameko ezisolisayo ku: 031 311 9611 nasemaphoyiseni ku: 10111.

Bangabika naku: 080 13 13 111, isms ku: 083 700 0819 noma bathumele i-email ku-custocare@ elec.durban.gov.za.