UDlamini uzothamela elesitshudeni esibulewe
KULINDELEKE ukuthi lihanjelwe nanguNgqongqoshe woMnyango waBesifazane ehhovisi likamengameli, uNksz Bathabile Dlamini, icala lesitshudeni saseMangosuthu University of Technology okusolwa ukuthi sidutshulwe sabulawa obeyisoka ngeledlule.
Umsolwa uMnuz Thabani Mzolo (23) uzovela namhlanje eNkantolo yeMantshi, eThekwini lapho kulindeleke ukuthi afake isicelo sebheyili.
Ukubulawa kwesitshudeni, uZolile Khumalo (21) endaweni ehlala izitshudeni iLonsdale, eThekwini kudonse amehlo abantu abaningi.
Iningi libabaze isihluku sikamsolwa, lazwakalisa nokuzwelana nomndeni kaZolile obenza unyaka wokuqala kwizifundo zeQuantity Surveying.
Ethintwa uMengameli womkhandlu wezitshudeni eMUT, uSandile Dlamini uyiqinisekisile imibiko yokuthi uNksz Dlamini uzohambela leli cala.
“Yebo, sizwile ukuthi uNgqongqoshe uBathabile Dlamini uzohambela icala,” kusho uSandile.
Khonamanjalo, umbutho wabesifazane we-IFP, Inkatha Freedom Party Women’s Brigade (IFPWB) ukhiphe isitatimende izolo uqinisekisa ukuthi uzobe uyingxenye yalabo abazobe behambele leli cala.
Usihlalo we-IFPWB, uNkk Thembeni kaMadlopha-Mthethwa, uthe bazobe besenkantolo ukweseka umndeni wakwaKhumalo nokubonisa umhlaba wonke ukuthi abahambisani nokuhlukunyezwa kwabantu besifazane.
Uthe banxusa wonke amadoda ukuthi abe yisibonelo esihle kumadodana awo nakwamanye amadoda, alwe nokuhlukunyezwa kwabantu besifazane.
“Abesifazane nezingane abakwazi ukuqhubeka nokuhlala ngokwesaba emphakathini bengazithokozeli izithelo zokuphila ngesikhathi sentando yabantu,” kusho uNkk kaMadlophaMthethwa.
Uthe isigwebo salabo abatholakala benecala lokuhlukumeza abesifazane kumele sibe nqala ukuze sithumele umyalezo kulabo abasaqhubeka nalesi sihlava.
Uveze ukuthi ukukhula kwesibalo sokubulawa kwabesifazane nezingane kuyakhombisa ukuthi usemkhulu umsebenzi okumele wenziwe kulelizwe ukushintsha indlela yokucabanga yabantu.
Unxuse amadoda ukuthi asize ukulwa nalesi sihlava sokubulawa kwabesifazane ngokukhuluma namanye amadoda, akhuze lo mkhuba.
Ugcizelele ukuthi kumele zonke izikhungo zemfundo ephakeme ukuthi ziqinise ezokuphepha ezindaweni ezihlala izitshudeni.