Iyobanjwa ngesithele nayo ezifundeni ze-ANC
AKWAZIWA mbhantshi kujiya ngezingqungquthela ezine zezifunda ze-ANC KwaZulu-Natal okulindeleke ukuba zibe ngempelasonto.
Izifunda okulindeleke ukuba zihlale iMusa Dladla, Nkosi Bhambatha, Far North neMalahleni.
IMusa Dladla isifunda sesithathu ngobukhulu se-ANC esifundazweni ngemuva kweTheku neMoses Mabhida.
Ilungu lesigungu esiphezulu se-ANC uNkk Edna Molewa esithangamini nabezindaba KwaDukuza ukuqinisekisile ukuthi lezi zifunda ezine zizohlala kule mpelasonto.
Uthe bazozihlalisa kanyekanye ngoba bafuna kushaye isikhathi sengqungquthela yesifundazwe zibe sezihlalile.
“Lezi zifunda sezikulungele ukuba nezingqungquthela njengoba u-70% wamagatsha azo usuyenzile imihlangano yamagatsha,” kusho uNkk Molewa.
Amagatsha kulezi zifunda asebaphakamisile abaholi afisa abahole.
EMusa Dladla kunezinhlangothi ezimbili, kukhona oluphakamise esikhundleni sikaSihlalo uMnuz Mdu Mhlongo oyiMeya yoMkhandlu waseMhlathuze, uNkk Thembeka Mchunu kwesePhini likaSihlalo noMnuz Tholi Gwala kwesikaNobhala. UGwala kumanje vele unguNobhala wenhlangano kulesi sifunda.
UNkk Mchunu ophakanyiselwe kwesePhini likaSihlalo ungunkosikazi welungu lesigungu esibhekele ukusebenza kwenhlangano iNational Working Committee, uMnuz Senzo Mchunu oke waba nguSihlalo we-ANC nondunankulu KwaZulu-Natal.
Uhlangothi loMhlongo kuthiwa lubanga nolukaMnuz Bheki Ntuli ophakanyiselwe kwesikaSihlalo, Nkk Nonhle Mkhulisi oyiMeya yoMkhandlu iKing Cetshwayo noMnuz Jeke Zulu, oqokelwe kwesikaNobhala.
UNkk Mkhulisi okwamanje unguSihlalo walesi sifunda.
EMalahleni kukhona uhlangothi olubophele abaholi be-ANCYL kwesikaSihlalo okuphakanyiswe kulo uMnuz Senzo Khumalo, iPhini lakhe uMnuz Mgcinisizwe Ndaba, uNobhala uMnuz Mafika Mndebele, isekela lakhe uNksz Zanele Kubheka, noMnuz Makhosini Nkosi kwesikaMgcinimafa.
UMndebele kumanje unguNobhala we-ANCYL esifundeni. UNkosi uyiMeya yoMkhandlu waseNewcastle.
Kulolu olunye uhlangothi kwesikaSihlalo kuphakanyiswe uMnuz Ntuthuko Mahlaba, asekelwe uNkk Phumzile Mbatha-Cele, uNobhala uMnuz Chris Hlophe, asekelwe uNkk Phumzile Mgcine noMnuz Msobomvu Nkosi kwesoMgcinimafa.
ENkosi Bhambatha kukhona uhlangothi lukaMnuz Jomo Sibiya ophakanyiselwe kwesikaSihlalo, asekelwe uMnuz Siphamandla Mchunu, uNobhala uNksz Ntombi Ngubane, asekelwe uMnuz Lucky Khumalo, uMgcinimafa uMnuz Zimingaye Mchunu.
USibiya uyilungu lesiShayamthetho KwaZuluNatal kanti uke waba ngumholi we-ANCYL eThekwini.
Kulolu olunye uhlangothi kukhona uMnuz Lucky Moloi, asekelwe uMnuz Sduduzo Mdluli, noNobhala uMnuz Bheki Lembebe, asekelwe uNkk Lungi Mabaso kuthi uMgcinimafa uMnuz Linda Ngubane.
EFar North ziqhathwe kanje, kukhona uhlangothi kwesikaSihlalo oluphakamise uMnuz Bethuel Mthethwa, asekelwe uMnuz Jabulani Mkhabela, Nobhala Siphile Mdaka, asekelwe uNksz Zodwa Mhlongo kuthi uMgcinimafa nguMnuz Thobelani Ncampalala. UNcampalala okwamanje unguMgcinimafa we-ANCYL KwaZuluNatal, kulolu olunye uhlangothi kukhona uMnuz Mbongeleni Gina kwesikaSihlalo, asekelwe nguMnuz Mandla Ndlela, uNobhala uMnuz Nkosingiphile Mlambo, asekelwe uMnuz Muzi Bhengu kuthi uMgcinimafa nguNkk RH Gumede.
Esinye isifunda obekulindeleke ukuthi sihlale kule mpelasonto, Abaqulusi kodwa ngeke sihlale ngenxa yokuthi kunemihlangano yamagatsha okumele ihlale kule mpelasonto.
Izifunda ezintathu iLower South Coast, Harry Gwala neMoses Mabhida kulindeleke ukuthi zihlale ngempelasonto ezayo kodwa akucaci ukuthi zizohlala yini ngenxa yokuthi zikhungethwe yizinkinga.