Bayabulawa abantu eKZN amaphoyisa awezi nasisombululo
UYIHLABE esikhonkosini uNgqongqoshe wezamaPhoyisa kuleli uMnuz Bheki Celi uma ethi “ahuqa ubuthongo” amaphoyisa nethimba lezobunhloli, abaphenya ngesihlava sokubulawa kosopolitiki KwaZulu-Natal.
Bekungezwakala sengathi uCele ukhulunyiswa wukudinwa ngokugxeka laba baphenyi kepha akushilo kuyiqiniso.
Ubufakazi balokhu nje wukuthi ubekhuluma kade eyobhonga emswaneni lapho kungqoklozwe khona ngesibhamu ilungu le-ANC, uMnuz Sifiso Cele, ebelingumgcinimafa egatsheni lasoShabeni esifundeni iLower South Coast.
Bayaphela abantu KwaZulu-Natal kodwa amaphoyisa kawaqhamuki nokuphathekayo kunalokho oshayasibhamu bayacanasa.
KwiKhomishini kaMoerane ebiphenya ngokubulawa kosopolitiki KwaZulu-Natal, obunye bobufakazi obethulwe kuyo ngobuthi ukungaboni ngaso linye, izikhundla nenkohlakalo ngezinye zezizathu ezenza ukuthi kubulawe osopilitiki kulesi sifundazwe.
Zintathu izifunda ezikhathazayo ngokubulawa kosopolitiki okuyiLower South Coast, Moses Mabhida neHarry Gwala.
ELower South Coast nje sekubulawe amalungu ayisithupha kule minyaka edlule kanti emasontweni amathathu kubulawe ababili njengoba ngaphambi kokubulawa kukaCele kuqale kwasuswa uNkk Nombuso Mqadi.
Siyazibuza-ke ukuthi ithimba elijutshwe ukuphenya ngalokhu kubhuqwabhuqwa kosopolitiki ngabe liphenya okunjani njengoba isibhamu silokhu sishilo nje kodwa kungaboshwa muntu.
Ngabe amaphoyisa nabezobunhloli banawo amava nezinsiza ezifanele ukuphenya bajule ngobugebengu obunzulu njengalobu?
Ukubhavumula kukaCele mhlawumbe kuzoba nomthelela sibone umnyakazo ngalolu phenyo, okubalulekile sibone izikhohlakali nezigilamkhuba ziboshwa.
Imindeni, izihlobo nabangani bayadinga ukuthi isilonda esibhibhayo sokushiywa ngabathandiweyo babo, basithobe ngokuphuma kweqiniso lokuthi ngobani abenzi bobubi nababopha amatulo okubulala.