Usafisa ukuba wumsakazi yize esenesikhundla
YIZE esegixabezwe ngesikhundla sokuba ngumphathi wophrojusa esiteshini iNanda FM, eThekwini kodwa uNhlanhla Welcome Ngwenya (30), waseMadadeni, eNewcastle, uthi ukusakaza yikhona akuthandayo.
Le nsizwa ekufundele ukusakaza inguphrojusa wohlelo lwasemini olwenziwa nguLihle Mthethwa, iBusiness Class engena ngo-12 emini iphele ngo-3 ntambama.
Ekhuluma ngokungena kwakhe emsakazweni uthe eqeda isikole ngo-2006, eDedangifunde High, wafaka isicelo sokufundela umculo eDurban University of Technology.
“Umculo ngenye yezinto engizithandayo. Kodwa izinto azihambanga ngendlela engifisa ngayo nokwaphoqa ukuthi ngingaqhubeki nokufunda. Ngahamba ngaya eGoli ngathola umsebenzi kwaKFC, ngasebenza khona isikhathi eside. Ngemali engangiyihola ngabhalisela ukufundela ukusakaza e-Intec College,” kuchaza uNhlanhla.
Uthe eqeda ukufunda waqhubeka wasebenza kancane ngemuva kwalokho wayofundela ukucula eState Theatre ePitoli.
“Ngo-2010 ngabona kwi-internet ukuthi kudingeka abantu abazosakaza esiteshini, iChats Radio, eseChartsworth, eThekwini. Ngasifaka isicelo somsebenzi bangiphendula bathi angifike futhi kwangilungela. Kulo msakazo awunikwa uhlelo kodwa uyangena leso sikhathi owabelwe sona usakaze enxanxatheleni yezitolo ubheke khona izinto ezenzakalayo ngaphakathi ukhulume ngazo,” kuchaza yena.
Uthe wafunda lukhulu kulesi siteshi njengoba aqonda nangendlela umsakazo osebenza ngayo.
“Ngisebenza kuleso siteshi ngahlangana noLucky Alex Khumalo owayesebenza kwiNanda FM, owangitshela ukuthi ake ngizame inhlanhla yami kulo msakazo. Nangempela ngo-2014 ngafaka isicelo nganikezwa ithuba lokuba wuphrojusa,” kuchaza yena.
Kulesi siteshi uthe waqala waba uphrojusa wohlelo lwantambama, iLoxion Drive engena ngo-3 iphele ngo-6, olwalwenziwa uLee Hlophe osanda kujoyina umsakazo Ukhozi FM.
“Ngaphinde nganikwa olokuphrojusa olwasekuseni, iRise and Rock olwenziwa nguSiya Seme. Ngafunda okuningi kuzona zonke lezi zinhlelo,” kuchaza yena.
Uthe ukunikwa ithuba lokuphatha ophrojusa esiteshini kumjabulisile njengoba ezofundisa abasakhula izinto eziningi.
Uthe umsebenzi wakhe manje ukuhlangana nophrojusa baxoxe ngezinto okumele zenziwe esiteshini ngalolo suku nezihloko okumele kukhulunywe ngazo.
Uthe ngelinye ilanga uyafisa ukuba nohlelo lwakhe njengoba ekhula ayebukela kubantu okukhona kubo uBongani “Kansas” Mchunu noMandla Malakoane.
Uma ufuna ukuzibona kule ngosi ungangithumelela i-email ku-nokubongwa.phenyane@inl. co.za noma ungithinte ngocingo ku-031 308 2767.