Ufuna kubuye umoya wonesi bakudala ababeyithemba
UNGQONGQOSHE wezeMpilo KwaZulu-Natal uDkt Sbongiseni Dhlomo ubonge bonke onesi abasebenza ngokuzikhandla esifundazweni.
UDhlomo ubekhuluma emhlanganweni obuseThekwini ngoLwesibili njengoba ngoMgqibelo kuzobe kugujwa usuku lonesi. Inhloso yomhlangano bekungukuhlanganisa uhlelo lomnyango lokusebenzisa amakhono nesipiliyoni samanesi asathatha umhlalaphansi ukuthi kuphuculwe ezempilo esifundazweni.
Ekhuluma nonesi abasayibambile nabanye asebathatha umhlalaphansi nezikhulu zomnyango wakhe, uDhlomo uchaze onesi njengabantu okumele banakekele iziguli. Uthe isizukulwane samanje singafunda lukhulu konesi asebathatha umhlalaphansi.
“Sidinga ukubheka ukuthi yini engahambanga kahle bese sibuyela kokwakwenziwa lapho abahlengikazi babeyisisekelo sothando, uzwelo nokunakekela,” kusho uDhlomo.
Uthe emhlabeni jikelele uma ukhala ngezempilo ezingekho esimeni esigculisayo, ukwazi ukulungisa leso simo ngokuthi ubuyele emuva, uqhakambise iqhaza labahlengikazi.
UDhlomo uthe onesi bangamanxusa okunakekelwa kweziguli.
“Unesi wuyena muntu onika izeluleko ngoba uhlala kakhulu nesiguli kunabanye abasebenzi bezempilo. Udokotela ufika ngaleso sikhathi nosokhemisi ngokunjalo kodwa unesi uhlala nesiguli amahora angu-8 kuphinde kungene omunye unesi uma kushaya isikhathi sokushayisa sobekade ekhona.”
Uthe uma umuntu efuna ukunakekela iziguli zigculiseke, kumele kulalelwe onesi. UDhlomo uthe onesi kumele babuyele ekubeni ngabaholi okuyinto ababenayo kudala.