Ufuna kuqiniswe amaphoyisa omasipala
UMNYANGO wezokuBusa ngokuBambisana neziNdaba zoMdabu KwaZulu-Natal ubheka izindlela zokunqanda iziteleka zabasebenzi bemikhandlu ezigcina ngokucekela phansi ingqalasizinda.
Ethula isabelo sezimali uNgqongqoshe walo mnyango, uNkk Nomusa Dube-Ncube uthe kumele kuliwe nalesi sihlava esibonakala sanda komasipala abehlukene.
UNkk Dube-Ncube uthe uma abasebenzi benganeme ngokuthile emkhandlwini bangenela umbhikisho bese becekela phansi ingqalasizinda.
“KuMasipala uGu, kulimaze ezokuvakasha nokwakhiwa kwemisebenzi.
EMsunduzi kube yisimo esifanayo kanti yinto esiyibhekayo,” kusho uNkk DubeNcube.
Usho lokhu nje ngesikhathi kunesiteleka sabasebenzi kuMasipala uGu kwavalwa amanzi kwacekelwa nengqalasizinda yamanzi kulo mkhandlu.
Kudle enkulu imali ukulungisa le ngqalasizinda.
UNkk Dube-Ncube uthe lokhu kucekelwa phansi kwempahla kwenzeka emini kabha kodwa bangezwa lutho emaphoyiseni emikhandlu.
“Kudingeka kuqiniswe ukusebenza kwamaphoyisa omkhandlu ukuze avikele izikhungo.
Kushiswa izimoto emini kwabha ekubeni amamashi asuke ehlelwe ngendlela agunyaziwe, ngezinye zezinto okumele zishintshe lezi.”
UNkk Dube-Ncube uthe omasipala abaningi esifundazweni bayisukumela ngokushesha eyezinkinga zamanzi nogesi.
“Sekufana nesiko ukuthi izinkinga ezithinta ukuphela kwamanzi nogesi kulungiswa emahoreni ambalwa. Sizama ukuthola amakhono abantu abafana nonjiniyela ukuze inkinga isheshe ilungiseke.”
Uthe likhulu ibanga eselihanjiwe ekunikezeni umphakathi ugesi namanzi emkhandlwini efana neTheku naseMsunduzi futhi likhulu ibanga elihanjiwe ukuhlinzeka ngalezi zidingo.
Uqhube wathi besebenzisana ne-Eskom bahlinzeke imizi engu269 647 ngogesi.
“Ucwaningo lweStats SA lwango-2016 lwaveza ukuthi u-11.3% kuphela wemizi engu-2.8 million engenawo ugesi, okusho ukuthi u-88% usunawo ugesi esifundazweni.
Kanjalo namanzi uNkk Dube-Ncube uthe likhulu ibanga elihanjiwe ukuhlinzeka umphakathi ngawo.
Uthe bavuselela namadolobha amancane okubalwa iXobho, Harding, Umdoni namanye. Njengoba lo mnyango usebenzisana nomasipala uqhubeka nomkhankaso wokugqugquzela imiphakathi ukuthi ikhokhele izidingo. Namhlanje lo mkhankaso uzoba KwaDukuza lapho kulindeleke ukuthi kusayinwe isivumelwano sokuthi osomabhizinisi, izinhlangano zabakhokhi bentela bazokhokhela izidingo.
Omasipala besifundazwe bakweletwa uR16.5 billion wezidingo ngumphakathi, osomabhizinisi neminyango kahulumeni.