‘Kusamele ukwazi ukumela izikweletu’
BAZOJABHA abantu abangasebenzi akade bezitshela ukuthi sebezokwazi ukutsheleka imali nokukweletelwa ngaphandle kwemibandela emuva kokuthi isazi sezikweletu, uMnuz Lee Naik, sithi busadingeka ubufakazi bokuthi umuntu uzokhokha kanjani.
UNaik ,isikhulu esiphezulu senkampani esiza abantu ngolwazi lwabo lwezikweletu iTransUnion, uthe ukuthi izitolo zezimpahla ziwine icala lokuthi abantu abangaqashiwe bangakweletelwa akusho ukuthi umthetho usuyaxega.
“INational Credit Act isazosebenza kodwa umehluko wukuthi ngeke babandlululwe abangaqashiwe, inqobo nje uma bukhona ubufakazi bokuthi bazokwazi ukukhokha. Bazojabha akade sebezitshela ukuthi bazokweletelwa noma bengasebenzi. Ukuwina kwezitolo kusho ukuthi abadayisi basemgwaqweni, osomatekisi nabantu abazisebenzayo bazokweletelwa. Isikhathi esiningi abazisebenzayo banama-akhawunti okulondoloza imali futhi bavamise ukuthenga ngokheshi,” kusho uNaik.
Uthe isinqumo senkantolo sisho ukuthi nabo sebezokwazi ukunikezwa isikweletu ngeke bakhishwe inyumbazane ngokuthi abasebenzeli izinkampani ezinkulu.
Yize kunjalo, uNaik uthe abantu akufanele bazixhaphaze izinguquko zeNational Credit Act kodwa kufanele badale izikweletu abazidingayo.
“Ngibonile emaphephandabeni kuthiwa sekuzokweletelwa nabangasebenzi kodwa iqiniso wukuthi kuzokweletelwa abanobufakazi bokuthi bayakwazi ukukhokha. Kufanele okweletisayo azi ukuthi umuntu ungenelwa yimali, abone ukuthi ingena nini futhi uzokwazi yini ukusikhokha isikweletu. Izinguquko zeNational Credit Act azisho ukuthi noma wubani kufanele adale isikweletu kodwa zifaka abantu akade bekhishwa inyumbazane kudala.”
Uthe bawu-25 million abantu baseNingizimu Afrika abanezikweletu kodwa bawu-600 000 kuphela abazi isimo sabo sezikweletu.
“Abantu kufanele babheke isimo sabo kwezezikweletu ngokuthinta iTransUnion ku-0861 482 482 noma bangene kwiwebsite yethu www. transunion.co.za. Akufanele bahlale bengazazi ngoba sithole ukuthi u-73% womholo ukhokhela izikweletu bese enye yenza izidingo,” kusho uNaik.
Uzwakalise ukukhathazeka ngokucwila ezikweletini kwabantu wathi kufanele bazikhokhele ngesikhathi, bangawazibi ama-sms abakhumbuza ukuthi bakhokhe.
Ugqugquzele abantu ukuthi bakwelete uma bephoqwa yisimo, ngaphandle kwalokho bonge imali ukuze bathenge abakudingayo.
“Umthetho iNational Credit Act wenzelwe ukuvikela abathengi ngakho noma sekunezinguquko zokuthi kukweletelwe abangaqashiwe ezinkampanini ezithile usazobavikela abantu. Okwethu wukuthi sizithibe ekukweleteni sizame ukuqeda izikweletu esinazo ngoba nomnotho awukhuli ngendlela esiyilindele,” kusho uNaik.
Ngaphambi kokudala isikweletu esisha abantu kufanele bazibuze ukuthi umholo wabo unyuke ngamalini, ngabe bazokwazi ukusikhokhela isikweletu esisha baphinde balondoloze imali.