Usuzovala ngesithupha uma ukwi-ATM
UKUBONA abantu bekhala ngokuqolwa kuma-ATM kwenze abakwaFNB baqinise ezokuphepha ngokuthi amakhasimende afake amanyela eminwe uma ezokhipha imali.
Lobu buchwepheshe bethulwe ngoMsombuluko eFNB eGauteng.
UNkk Lee-Anne van Zyl, isikhulu seFNB Points of Presence, okuwuphiko oluze nobuchwepheshe bamanyela eminwe emishini yemali, uthe baqinisa ezokuphepha ngoba abafuni abantu balahlekelwe yimali abayilondoloza kanzima ebhange.
“Abantu sebezokwenza okuningi kuma-ATM ethu ngoba bazokwazi ukukhipha imali, ukuyifaka, ukuthenga ugesi, ukuthumela imali kwamanye amaakhawunti nokwenza eminye imisebenzi kuma-akhawunti abo. Okuhle wukuthi kuzodingeka amanyela esithupha somuntu ukuze asebenzise ibhange. Okusho ukuthi akekho omunye ozokwazi ukumqola,” kusho uNkk van Zyl.
“Siqale ukusebenzisa lobu buchwepheshe kuma-ATM aseGauteng ngoNovemba kodwa manje sesizoba nabo kuwo wonke ama-ATM ethu. Sizophinde sibe nawu-50 emakhaya nasemalokishini ezinyangeni eziyisithupha ezizayo,” kusho uNkk van Zyl.
Uthe ubuchwepheshe buzosiza kwezokuphepha kodwa buzophinde buqinisekise ukuthi abantu abaningi bayakwazi ukusebenzisa ibhange ngisho labo abangakwazi ukusebenzisa ubuchwepheshe besimanje ngoba ukufaka isithupha kuveza yonke imininingwane edingwa yikhasimende.
“Sizosebenzisana nezitolo ezincane zasemakhaya lapho abantu abadala behola khona impesheni bathenge nokudla ukuze siqinisekise ukuthi amakhasimende ethu awasayi emadolobheni uma efuna ukusebenzisa ibhange. Ukuphepha kwawo kuseqhulwini nokuqinisekisa ukuthi ayafinyelela kwezokubhanga,” kusho uNkk van Zyl.