‘Izinkampani ezincane yizo eziqasha intsha eningi’
BAZODALA u-90% wamathuba omsebenzi osomabhizinisi abancane ngo-2030, okusho ukuthi uhulumeni kufanele abaxhase ngazo zonke izinsiza abazidingayo.
Lokhu kushiwo wuMnuz Simon Leps oyisikhulu esiphezulu senkampani esiza osomabhizinisi abancane iXPRS Capital Africa.
ULeps uthe osomabhizinisi abancane akufanele basabe ukucela usizo kuhulumeni nasezinkampanini ezizimele ngoba iqiniso wukuthi yibona abakwazi ukudala amathuba omsebenzi amaningi.
“Izinkampani ezinkulu azikwazi ukudala amathuba omsebenzi amaningi kodwa ezincane yizona ezizoqasha inqwaba yentsha ehleli emakhaya. Kufanele sibaxhase osomabhizinisi abancane ngakho konke abakudingayo ngoba njengamanje amabhizinisi amancane asungulwayo ayawa kungakapheli iminyaka emithathu. Kufanele uhulumeni asize osomabhizinisi abancane ngokunciphisa imicikilisho eminingi uma kubhaliswa ibhizinisi njengowentela yezimpahla iValue Added Tax (VAT). Kufanele banikwe nezibonelelo zokuthi bangayikhokhi intela ngoba basathuthuka,” kusho uLeps.
Uthe osomabhizinisi abancane kufanele bathekele ulwazi kosomabhizinisi abadumile abaphumelelayo emikhakheni ethile.
“Osomabhizinisi abancane kufanele benze imikhiqizo edingwa yizinkampani ezinkulu naleyo encike kubuchwepheshe besimanje ukuze bangawi,” kusho uLeps.
Uveze ukuthi okuwisa abantu wukungahleli kahle ukuthi uma selikhula ibhizinisi impahla ithengwa kanjani nokuthi wobani amakhasimende amasha azothenga impahla kulona.
“Kunosomabhizinisi abajaha ukuthenga izimoto ezinhle uma bebona ukuthi ibhizinisi lihamba kahle. Empeleni akufanele bakwenze lokhu kodwa kufanele balondoloze imali yabo beze nezinhlelo ezintsha zokudayisa imikhiqizo yabo balwe nokuthi bangabi nezikweletu ezidlula imali engenayo. Uma benza lokho izinkampani zabo ngeke ziwe kungakapheli iminyaka emithathu,” kusho uLeps.