‘Asilindele ukuthi abuye elambatha amabhokisa’
KUYETHEMBISA ngeqembu labashayisibhakela besigaba sama-amesha elimele iNingizimu Afrika emqhudelwaneni i-AFBC Youth Championship oseMorocco.
INingizimu Afrika imelwe nguVuyolwethu Dila (51kg) waseEastern Cape no-Amorie Gonsalves (60kg) waseGauteng kwabesifazane. Kwabesilisa kubhekwe uNdikho Nyebe (56kg) wase-Eastern Cape, Sakhilwe Hlatshwayo (60kg) waKwaZulu-Natal noJohn Masamba (64kg) waseGauteng. Iqembu lifulathele leli ekuqaleni kwesonto nabaqeqeshi uNathi Thusi waseKZN noKhangelani Jack wase-Eastern Cape.
Nakuba u-Amorie esheshe waphuma kodwa kade kusabhekwe lukhulu kuDila, Hlatshwayo noMasamba obekulindeleke ukuthi balwe esigabeni sama-quarterfinal izolo. Kusasa uNyembe uzolwa kowandulela owamanqamu.
I-AFBC eqhatha amazwe aseAfrika izosongwa ngoMgqibelo eCasablanca. Umqhudelwano uyindlela yokuzibekisela indawo kwiYouth Women’s and Men’s World Championships ezoba ngo-Agasti. Abashayisibhakela base-Afrika babekelwe izindawo eziwu-18 kuphela ngokohlelo lwe-AIBA, inhlangano eyengamele isibhakela sama-amesha emhlabeni.
Unobhala weSouth African National Amateur Boxing Organisation (SANABO), uPretty Tsotetsi, uthe nakuba abashayisibhakela abamele iNingizimu Afrika bengenawo amava esibhakeleni samazwe kodwa abalindele ukuthi babuye belambatha eMorocco.
“Umqhudelwano unzima kakhulu ngoba kuqhudelana amazwe aseqophelweni eliphezulu e-Afrika. Awethu amabhokisa alwa okwesibili ezingeni lamazwe kodwa ayilungele inselelo ngokomqondo nangokomzimba. Banabaqeqeshi abasebancane abazinikele,” kusho uTsotetsi.
“Siyethemba ukuthi ngeke babuye belambatha ngoba ngesikhathi beqala ukulwa ezingeni lamazwe kweyokubungani ngoFebhuwari, benza kahle kakhulu. Ngakho angicabangi ukuthi bazobhekana nobunzima kulokhu.”
INingizimu Afrika ibhekane nobunzima eminyakeni embalwa edlule ukuzibekisela indawo emiqhudelwaneni emikhulu. Izinto ziqale ukwenyukela emuva kokuthi i-AIBA ishintsha indlela yokuzibekisela indawo ikakhulukazi kuma-Olympic nakumaCommonwealth, akwangaba kusaba ngamazwekazi kodwa yafuna amazwe abange ndawonye.
Khonamanjalo, sikhulu isililo ngokudlula emhlabeni kobenguphromotha wesibhakela wokuqala wesifazane, uGladys “Norfoty” Tsenene (77), obengumnikazi weRainbow Promotions odlule emhlabeni ngeSonto emuva kokugula. Ngo2010 waqokwa njengePromoter of The Year yiBoxing South Africa (BSA). Ayikacaci imininingwane yokufihlwa kwakhe.