Umbandela omusha kwelaseKZN leNetball

UGCWELE ukuzethemba umdlali weKingdom Stars, uXolile “Small” Shange ngaphambi kokuqala kwesizini ka-2018 yeBrutal Fruit Netball Premier League ngempelasonto.

Yize uShange eneminyaka engu-21 kodwa usengathathwa njengomunye wabadlali abanamava eqenjini laKwaZulu-Natal aqale ukulidlalela ngo-2015.

Ukholwa wukuthi bafundile emaphutheni abawenze nyakenye lapho iqembu lihlulekile wukuqeda kwiTop 6 okuwumbandela abebezibekele wona.

“Ngiyajabula ngokuqhubeka nokuba seqenjini. Kulokhu sizimisele ngokuthi siqede emaqenjini amane aphezulu (kwangu-10). Okuhle wukuthi wonke umuntu eqenjini ucabanga ngendlela efanayo. Siwalungisile amaphutha esiwenze nyakenye,” kusho uShange odabuka eNanda.

IStars izovula imidlalo neNorthern Cape Diamonds kusasa ngo-4 ntambama e-Ellis Park Indoor Arena, eGoli.

NgoMgqibelo izobhekana ne-Eastern Cape Aloes ngo-9 ekuseni. Yonke imidlalo ise-Ellis Park.

UShange odlala indawo ye-Wing Attack, nobeyingxenye yamaBaby Proteas adlale kwiYouth World Cup nyakenye, uthe ukuqala ngonyawo oluhle kulo nyaka yikhona okuzoba wukhiye.

“Ngiyakholwa wukuthi singanqoba, ikakhulukazi umdlalo wethu wokuqala neDiamonds ngoba nyakenye sibashaye ngegebe elikhulu. Nakowesibili kuzomele silinyuse izinga. Nyakenye i-Aloes isihlule ngegebe elincane ngenxa yamaphutha esiwenzile.”

Into okukhalwe ngayo kakhulu eqenjini leStars nyakenye wukuhluleka wukufaka amagoli.

“Sikulungisile lokho. Ama-goal shooter ethu kulokhu made futhi laba ababekhona bawalungisile amaphutha. Nathi sizimisele ngokubasiza,” kusho uShange.

Nyakanye umqhudelwano unqotshwe yiJaguares yaseGauteng ngemuva kokuhlulwa kathathu kweyamanqamu eminyakeni edlule.

Ompetha bona bazovula imidlalo neDiamonds ngoMgqibelo ngo-11 ekuseni bese ngeSonto babhekane neWestern Cape Southern Stings okungelinye lamaqembu aqinile kwiligi.