ICosmos isiyilungele eyokuhlunga
AKAFUNI ukugxila kakhulu emlandweni omuhle wezakhe emidlalweni yokuhlunga umphathi weJomo Cosmos, uJomo Sono.
Lezi zindaba zivele ngesikhathi exoxa naleli phephandaba mayelana nezinhlelo zakhe ngale midlalo. ICosmos iqede endaweni yesithathu kwi-log yeNational First Division (NFD) ngemuva kwalokho yazibekisela indawo kweyokuhlunga.
I-Black Leopards iqede endaweni yesibili kwathi iHighlands Park yakhala yemuka nesicoco seNFD. ICosmos neLeopards sebelinde iqembu elizoqeda endaweni ka-15 kwi-log ye-Absa Premiership.
USono unerekhodi elihle emidlalweni yokuhlunga. Ngo-2014/2015, iCosmos iyona edle umhlanganiso kweyokuhlunga. Nango-2010/2011, ezikaSono yizona ezanqoba kweyokuhlunga ngesikhathi iNFD isahlukaniswe ngokwezigaba ezimbili i-Coastal Stream ne-Inland Stream.
Kowamanqamu yathela othulini iBay United ngo 5-4 sekukhahlelwa amaphenathi. Ngalesi sikhathi kwakusaba nama-semi final bese kudlalwa owamanqamu.
Kwaba yinto efanayo nango-2008/2009 ngesikhathi iCosmos iphuma phambili kweyokuhlunga.
“Umlando awusebenzi ebholeni, ngakho awukwazi ukuqhathanisa izikhathi ezahlukene. Ngeke uthi ngoba sashaya iKaizer Chiefs ngo 1-0 ngo-1990 bese uthi sizoyiphinda uma kungathiwa sidlala nayo manje. Sizoya laphaya sifike silwe. Wonke amaqembu azobe edlala kweyokuhlunga azobe enengcindezi. Into okumele siyenze wukuthi sinqobe bese singena esigabeni esikhulu. Uma sihluleka futhi sizophinde sizame ngokuzayo,” kusho uSono.
Iqembu lakhe seliphenduke iyoyo ngoba lifike lihlale isizini eyodwa esigabeni esikhulu bese ligawulwa yizembe.
“Into esisebenzele akusikona ukuthi sibophele iqembu elakhiwe ngabadlali abaningi abangaziwa. Akukona futhi ukuthi asinabo abadlali abadala. Lapha kwiCosmos akekho umdlali oyisihlabani. Uma udlalela izihlwele ngikutshela kahle ukuthi hamba uyodlala elokishini. KwiCosmos senza zonke izinto njengeqembu. Abafana bami bayilungele eyokuhlunga. Laba abayisikhombisa abangazange badlale sishaywa yiBlack Leopards bayalulama. Abathathu babo badlalile namuhla (ngoLwesibili) sidlala neBidvest Wits kowobungani. Konke kuyethembisa,” kusho uSono.
Kuzocaca ngoMgqibelo uma sekusongwa imidlalo ye-Absa Premiership ukuthi yiliphi iqembu elizojoyina iCosmos neLeopards kweyokuhlunga. Amaqembu asengozini yokudlala imidlalo yekuhlunga yi-Ajax Cape Town, Polokwane City, SuperSport United neBaroka FC.
“Amaqembu engiwesabayo yiMamelodi Sundowns ne-Orlando Pirates kuphela. Noma ngubani kulawa abanga izembe simlungele. Sizoyibuka cishe yonke imidlalo yala maqembu asengozini yokudlala kweyokuhlunga,” kuphetha uSono. Imidlalo yokuhlunga: NgoLwesithathu (Meyi 16): Leopards 2 v PSL Team NgoLwesihlanu: Jomo Cosmos v Leopards
NgoMsombuluko: Cosmos
NgoLwesihlanu: Leopards NgoMsombuluko: Leopards v Cosmos NgoLwesithathu: Cosmos v PSL Team PSL Team v Jomo PSL Team v