Izohambisana nomunyu eyokusongwa kwesizini
UKUSONGWA kwesizini ye-Absa Premiership ka-2017/2018 kuzobe kuphelezelwa wumunyu kwabanye abalandeli kwazise kuzobe kuwusuku lokuvalelisa kubadlali abebengaconsi phansi kubona.
Ngaphandle kokucacisa amaqembu azodlala kwiMTN 8 ngesizini ezayo, okuhambisana nokuthi yiliphi iqembu eliya kweyokuhlunga, imidlalo yokugcina izobe inika ithuba lokuvalelisa abadlali asebekucacisile ukuthi bayawashiya amaqembu abo.
Iningi lalaba badlali izinkontileka zabo ziyaphela ngoJuni 30 okusho ukuthi imidlalo yangoMgqibelo ezoqala ngesikhathi esisodwa ezweni lonke, izobe ingeyokugcina kubona bedlubhe imifaniswano abazakhele igama beyigqokile eminyakeni edlule.
Kule mpelasonto amehlo amaningi azobe ebheke kwi-Ajax Cape Town, Polokwane City, SuperSport United neBaroka FC ngoba oyedwa wabo ozongena kweyokuhlunga lapho bezodudulana khona neJomo Cosmos neBlack Leopards abaqede endaweni yesibili neyesithathu kwiNational First Division (NFD). Iyaqala imidlalo ngoLwesithathu oluzayo. Njengoba kukhona abazobe bebheke ukuthi izembe ligenca kuphi, abalandeli beKaizer Chiefs bazobe bevalelisa kunozinti wabo uBrilliant Khuzwayo. Lo nozinti ufike kwiChiefs emncane esuka kuMaZulu kodwa useze wakhula ekhuhla ibhentshi kwazise u-Itumeleng Khune akadedeli lutho. UKhuzwayo ophelelwa yinkontileka uzobe evalelisa nje kuzobe kubuhlungu kwabanye ngoba ukhonjwa kwi-Orlando Pirates.
Omunye umdlali ozobe evalelisa yisithandwa seMamelodi Sundowns saseZimbabwe uKhama Billiat. Naye uphelelwa yinkontileka. Kuthiwa ubheke phesheya kwezilwandle. Nakuba esekhona amaqembu amfunayo kuleli kodwa kuthiwa umqondo wakhe ususe-Europe.
Kuzobe kubuhlungu nakwabeLamontville Golden Arrows njengoba uKudakwashe Mahachi uzodlala okokugcina kwazise indlela yakhe ibheke kwiPirates.
Kuzobe kuyinto efanayo nakukaputeni weCape Town City, uRobyn Johannes, oseqede konke neBidvest Wits ephekwa uGavin Hunt. Ngaphandle kwabo noThabo Nthethe beno-Asavela Mbekile ziyaphela izinkontileka zabo ngakho-ke bazomukela izindondo eBloemfontein, uma iSundowns isiphakamisa indebe yokuba ngompetha beligi, maqede babone abafika ngayo.
Ukuthi bayisizile i-Ajax noma bahlulekile empini yezembe, uSiyanda Zwane, Yannick Zakri noRheece Evans, ngeke kusho lutho ngoba bayavalelisa eKapa. Kufanele babuyele kwiSundowns. Nomdlali ofana noVincent Pule uzobe ebonakala okokugcina kwiWits, ukhonjwa kwelilodwa phakathi kweChiefs nePirates.